Jańa reformalar, 20 mln halyq - Prezıdent 2023 jyldy qorytyndylady

2023 jyl - Qazaqstan úshin tabysy men taýqymeti qatar kelgen jyl boldy. Bul týraly Memleket basshysy Qasym-Jomart Toqaev jańajyldyq beınequttyqtaýynda aıtty, dep habarlaıdy Kazinform.

“Qadirli otandastar! Bárimiz bir el bolyp, Jańa jyldy qarsy alyp otyrmyz. Barshamyz eski jyldy oı eleginen ótkizemiz, aldaǵy jylǵa jospar jasap, jańa maqsat qoıamyz. Biz osy sátte bir-birimizge aq tilegimizdi arnaımyz, syı-qurmet kórsetemiz. Qasıetti Otanymyzdyń berekeli birligi jurtymyzdyń osyndaı tatý tirliginen bastalady”, - dedi Prezıdent quttyqaý lebizinde.

Memleket basshysy 2023 jyly Qazaqstan úshin tabysy men taýqymeti qatar kelgenin atap ótti.

“Ómirde qýanysh pen qıyndyqtyń alma-kezek bolýy – zańdylyq. Biraq, biz eńsemizdi tik ustap, keleshekke árdaıym senimmen qaraımyz. Bıyl jurtymyz Jańa jyldy kópten kútken jaǵymdy jańalyqpen qarsy alýda. Jaqynda halqymyzdyń sany 20 mıllıonǵa jetti. Elimiz úshin bul aq túıeniń qarny jarylǵan kún boldy. Halyq sanynyń ósýi – myqty memleket bolýdyń jáne órkendeýdiń kepili. Al, baqytty otbasy – baqýatty eldiń arqaýy”, - dedi Qasym-Jomart Toqaev.

Prezıdent aıtqandaı, Qazaqstan strategııalyq baǵdary aıqyn el retinde turaqty damyp keledi.

“Biz yntymaq-birliktiń jáne qajyrly eńbektiń arqasynda aýqymdy is-sharalar atqardyq. Jańarý men jańǵyrý jolyndaǵy mańyzdy reformalardy júzege asyrdyq. Osylaısha, memlekettigimizdiń tuǵyryn bekemdeı tústik. Zań men Tártip ústemdigin ornatýdy memlekettik saıasattyń negizgi baǵdary dep jarııaladyq. Osy baǵytta naqty sharalardy qabyldaýǵa kiristik. Bilim berý jáne densaýlyq saqtaý salasynda aýqymdy jobalardy 
qolǵa aldyq”, - dedi Prezıdent.

Elimiz ádildikke negizdelgen jańa ekonomıkalyq úlgige kóshe bastady. Bul halyqtyń turmys sapasyn jaqsartý úshin asa mańyzdy qadam boldy.

Shetelden mıllıardtaǵan dollar ınvestıtsııa tartyldy. Sonyń arqasynda elge asa qajet óndirister ashyldy. Jumys oryndary paıda boldy.

El ekonomıkasynyń basty qozǵaýshy kúshi retinde shaǵyn jáne orta bızneske jan-jaqty qoldaý kórsetiletin boldy.

"Zańsyz alynǵan ekonomıkalyq aktıvterdi elge qaıtarý jumysy da jalǵasýda. Memleketke qaıtarylǵan qarjy kóp uzamaı halyqtyń ıgiligine jumsalatyn boldy, ıaǵnı mektepter salyna bastady. Jyldar boıy ıgerilmeı kelgen mıllıondaǵan gektar jer adal sharýalarǵa beriletin boldy”, - dep qorytyndylady Memleket basshysy.