Jańa reforma Qazaqstandy demokratııalyq el retinde tanytatyn bolady - Esqaırat Haıdarov

ORAL. QazAqparat - Memleket basshysynyń Qazaqstan halqyna Úndeýin memlekettiligimizdi jańa satyǵa kóterýdiń zańdy jalǵasy dep bilemiz. Sonymen qatar bul bastamany elimizdiń saıası júıesin demokratııalandyrýǵa baǵyttalǵan naqty qadam, oń sheshim retinde qabyldaımyz. Bul týraly Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń aǵa oqytýshysy, tarıh ǵylymdarynyń kandıdaty Esqaırat Haıdarov málim etti, dep habarlaıdy «QazAqparat» HAA tilshisi.

Onyń aıtýynsha, Qazaqstan Respýblıkasy prezıdenttik basqarý nysanyndaǵy memleket bolyp tabylady. Elimizde 1995 jylǵy Konstıtýtsııa boıynsha kúshti prezıdenttik bılik qalyptasty. Ótpeli kezeńde eldi tyǵyryqtan shyǵarý úshin bıliktiń bir qolǵa shoǵyrlanǵany qajet boldy jáne ol ózin aqtady dep esepteımiz. Konstıtýtsııalyq reformaǵa sáıkes Prezıdent bıliktiń úsh tarmaǵynyń úılesimdiligin qamtamasyz etý, syrtqy saıasatty júrgizý, eldiń ulttyq qaýipsizdigin saqtaý jáne qorǵanysyn nyǵaıtý sekildi quzyrlyqtardy atqaratyn bolady. Prezıdenttiń áleýmettik-ekonomıkalyq jaǵdaıdy retteýdegi ókilettikterin Úkimetke jáne basqa da atqarýshy organdarǵa berý jónindegi sheshim memlekettik baǵdarlamalardyń júzege asyrylýynda atqarýshy bılik ókilderiniń jaýapkershiligin arttyryp, elimizdiń ekonomıkalyq damýyna tyń serpin beredi,  - dep oılaımyz.  Sondaı-aq memlekettik basqarýdyń tıimdiligin arttyrý barysynda bes ınstıtýtsıonaldyq reformada aıqyndalǵan kásibı Úkimetti qalyptastyrý jospary júzege asatyn bolady.

«Saıası reformanyń aıasynda Parlamenttiń de bedeli óse túsetin bolady. Úkimet Parlamenttiń aldynda jaýap beredi. Parlament saılaýynda jeńiske jetken partııa Úkimet quramyn jasaqtaýǵa múmkindik alatyn bolady. Mundaı júıe álemniń demokratııalyq jaǵynan damyǵan kóptegen elderine tán bolyp keledi. Qazaqstanda sol jolǵa túsip, ózin taǵy da búkil álemge demokratııalyq, quqyqtyq memleket retinde tanytatyn bolady. Sol sebepti elimizdiń  konstıtýtsııasyna, memleketti basqarý týraly zańdaryna ózgertýler men tolyqtyrýlar engiziletin bolady. Elbasy usynyp otyrǵan saıası jobany talqylaýǵa bilim salasynyń qyzmetkerleri, ustaz-ǵalymdar da atsalysyp, ózderiniń naqty usynys-pikirlerin bildirgeni durys. «Jeti ret ólshep, bir ret kes», degen, bári eskerile otyryp, túpkilikti sheshim qabyldansa, odan, eń bastysy, elimiz utady, dep oılaımyn», dedi E.Haıdarov.