Jańa poıyzdarǵa bılet satylymy búgin bastaldy
ASTANA. KAZINFORM — 5 qarashadan bastap Astana – Almaty jáne Astana – Semeı baǵyttarynda Stadler poıyzdaryna bılet satyla bastady.
5 qarashadan bastap jańa Stadler vagondarynan jasaqtalǵan №¾ «Nurly jol — Almaty-2» jáne № 153/154 «Nurly jol — Semeı» poıyzdaryna bılet satylymy bastalady. Alǵashqy poıyzdar elordadan Almatyǵa 11 qarashada, Semeıge 13 qarashada jolǵa shyǵady.
— Jańa vagondardan jasaqtalǵan poıyzdardy iske qosý Memleket basshysynyń jolaýshylar vagondary parkin jańartý jónindegi tapsyrmasyna sáıkes júzege asyrylýda. Búginge deıin «Jolaýshylar tasymaly» AQ 100-den astam Stadler vagonyn qabyldap aldy. Olardy kezeń-kezeńimen paıdalanýǵa berý jolaýshylarǵa qolaıly jaǵdaı jasap, qyzmet kórsetý sapasyn arttyrýǵa múmkindik beredi. Vagondar parkin jańartý kompanııa jumysynyń negizgi baǵyttarynyń biri, — dedi «Jolaýshylar tasymaly» AQ Basqarma tóraǵasy Ánýar Ahmetjanov.
Jańa vagondar elimizdiń klımattyq erekshelikteri men jolaýshylar tasymalyna qoıylatyn zamanaýı talaptar eskerile otyryp, Stadler Kazakhstan zaýytynda shyǵarylady. Kýpe vagondary 40, al platskart vagondary 56 jolaýshyǵa arnalǵan.
Vagondar aýa temperatýrasyn retteý júıesimen, ár orynǵa arnalǵan jaryq shamdarymen, 220 V rozetkalarymen, USB jáne USB-C qýattaý uıashyqtarymen, sondaı-aq beınebaqylaý júıesimen jabdyqtalǵan. Erekshe qajettiligi bar jolaýshylardyń saparyna arnaıy jaǵdaılar qarastyrylǵan. Poıyzdar quramynda ystyq taǵamdar, sýsyndar men jeńil tiskebasarlar satyp alýǵa bolatyn býfet vagondary bar.
Poıyzdardyń qozǵalys kestesi
№¾ «Nurly jol — Almaty-2» poıyzy kún saıyn qatynaıdy:
▪️ Nurly jol stantsııasynan saǵat 13:10–da jóneltilip, Almaty-2 stantsııasyna kelesi kúni saǵat 08:30–da keledi.
▪️ Almaty-2 stantsııasynan saǵat 12:12–de jóneltilip, Nurly jol stantsııasyna kelesi kúni saǵat 07:03–te keledi.
№ 153/154 «Nurly jol — Semeı» aıdyń taq kúnderi qatynaıdy:
▪️ Nurly jol stantsııasynan saǵat 16:40–ta jóneltilip, Semeı stantsııasyna kelesi kúni saǵat 06:10–da keledi.
▪️ Semeı stantsııasynan saǵat 15:00–de jóneltilip, Nurly jol stantsııasyna kelesi kúni saǵat 05:05–te keledi.
Bıletterdi bilet.railways.kz resmı saıtynan jáne temirjol vokzaldarynyń bılet kassalarynan satyp alýǵa bolady.
Aıta ketelik QTJ poıyzdarda ushaqtaǵydaı tamaqtaný júıesin engizýdi josparlap otyrǵany týraly jazǵan edik.
