Jańa platforma arqyly Qytaıǵa 24 myń tonna zyǵyr eksporttalady
ASTANA. KAZINFORM – Qazaqstan men Qytaı astyq jáne aýyl sharýashylyǵy ónimderin saýdalaýǵa arnalǵan birlesken tsıfrlyq platformany iske qosty. Jańa platforma eksporttaýshylar men satyp alýshylar arasynda tikeleı baılanys ornatýǵa yqpal etedi.
Qazirdiń ózinde 24 myń tonna zyǵyr jetkizý týraly kelisimshart jasalyp, platformanyń alǵashqy nátıjesi aıqyn kórindi.
Platforma Qazaqstan delegatsııasynyń Qytaıda ótken 8-shi Qytaı astyq saýdasy konferentsııasyna qatysýy aıasynda iske qosyldy. Іs-sharaǵa Qazaqstan Respýblıkasynyń aýyl sharýashylyǵy vıtse-mınıstri Nazgúl Hatepova qatysty.
Birlesken platforma Qytaı eliniń 50 myń aýyl sharýashylyǵy kásipornyn biriktiretin Astyq saýdasynyń ulttyq ınternet-platformasy negizinde quryldy. Onyń jumysyn atalǵan memlekettiń Azyq-túlik jáne strategııalyq rezervter jónindegi memlekettik basqarmasyna (NAFRA) qarasty Astyq saýdasyn úılestirý ortalyǵy qamtamasyz etedi.
Jańa tsıfrlyq platforma eki el kompanııalaryna saýda-sattyqty ınternet arqyly júrgizýge, áleýetti seriktestermen tikeleı baılanys ornatýǵa jáne deldaldardyń qatysýynsyz mámileler jasaýǵa jol ashady. Saýda-sattyq básekelestik negizde de, tikeleı kelissózder arqyly da júrgiziledi. Platformada ashyq aýktsıondar, shaqyrý boıynsha saýda-sattyq, ózara kelisim negizindegi jáne aldyn ala belgilengen baǵamen jasalatyn kelisimder qarastyrylǵan.
Olardyń senimdiligi men ashyqtyǵyn arttyrý úshin kepildik qamtamasyz etý, ınternet arqyly esep aıyrysý, táýelsiz tekserý jáne daýlardy sheshý tetikteri qarastyrylǵan. Bul eksporttyq kelisimderdi, sonyń ishinde baǵany aıqyndaý úderisin jedeldetip, ony barynsha turaqty ári boljamdy etýge múmkindik beredi.
- Búginde saýda alańynda Qazaqstannyń 35 kompanııasy tirkelgen. Qazirdiń ózinde 24 myń tonna maıly zyǵyrdy eksporttaýǵa qatysty mámileler jasaldy. Bul qytaılyq seriktesterdiń qazaqstandyq aýyl sharýashylyǵy ónimderine qyzyǵýshylyǵy joǵary ekenin kórsetedi. Alǵashqy kezeńde platforma arqyly dándi jáne maıly daqyldar, sondaı-aq ósimdik maıy men maı-tońmaı ónerkásibiniń ónimderi saýdalanady.
Aldaǵy ýaqytta Qytaı naryǵyndaǵy suranysty eskere otyryp, taýarlar tizbesi keńeıtilýi múmkin. Platformany tabysty paıdalaný ótkizý naryqtaryn keńeıtip, otandyq ónim jetkizý kólemin arttyra otyryp, elderimiz arasyndaǵy agrarlyq yntymaqtastyqty nyǵaıtatynyna senimdimin, — dedi Nazgúl Hatepova.
Aýyl sharýashylyǵy mınıstrligi otandyq óndirýshilerdiń syrtqy naryqtarǵa shyǵý múmkindigin arttyrý, eksporttyq áleýetti kúsheıtý jáne agrarlyq saýdaǵa zamanaýı tsıfrlyq sheshimderdi engizý baǵytyndaǵy jumysty jalǵastyrady.
Aıta ketelik Qazaqstan men Qytaı agrarlyq saladaǵy yntymaqtastyqtyń jańa baǵyttaryn aıqyndaǵan edi.
