Jańa patrıotızmge tárbıeleý maqsatynda balalar týrızmin damytý kerek - E. Tarasenko

ASTANA. QazAqparat - Jańa patrıotızmge tárbıeleý maqsatynda balalar týrızmin damytýdy keńinen engizý kerek. Búgin QR Memlekettik hatshysy Gúlshara Ábdiqalyqovanyń jetekshiligimen ótken QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda komıssııa múshesi Májilis depýtaty Elena Tarasenko osylaı málimdedi. Eske sala keteıik, ulttyq komıssııa otyrysynda balalar-jasóspirimder týrızmin damytý máseleleri talqylanǵan bolatyn.

«Búgin biz Ulttyq komıssııa otyrysyna elimizdegi asa ózekti máselelerdiń birin engizip otyrmyz. Bul balalar men jasóspirimderdiń bos ýaqyttaryn tıimdi uıymdastyrý, olardy ólketaný baǵytynda, qorshaǵan ortany qorǵaý aıasynda bilimderin damytý arqyly tárbıesin qalyptastyrý. Eń bastysy, biz elimizde balalar týrızmin salaýatty ómir saltyn damytý arqyly qalyptastyrý máselesine nazar bólý kerektigin oılastyrýǵa tıispiz», - dedi Elena Tarasenko.

Onyń paıymynsha, balalar týrızmin damytýdy ekskýrsııalar, saıahattar uıymdastyrý arqyly júzege asyrý mańyzdy ári bundaı qadam tulǵalyq qalyptasýǵa da jaqsy áser etedi.

«Máselen, Batys Qazaqstan oblysynda balalar men jasóspirimder týrızminiń stantsııalary ashylyp qana qoımaı, búgingi tańda olardyń materıaldyq-tehnıkalyq bazalary aıtarlyqtaı jaqsarǵan. Ár aýdan ortalyqtarynda, oblystyq deńgeılerde balalar men jasóspirimder týrızminiń ortalyqtary jumys isteıdi. Olar óńirdegi barlyq mektep balalaryn biriktirip, pedagogtardyń da qosymsha bilimderin arttyrýǵa yqpal etedi. Meniń oıymsha, bul másele Úkimet deńgeıinde qarastyrylýy tıis», - dedi depýtat E. Tarasenko.

Onyń sózine qaraǵanda, qazirgi kúni bilim jáne ǵylym mınıstrligi tarapynan balalar men jasóspirimder týrızmin damytý jónindegi tujyrymdamalyq qadamdar ázirlengen. «Sondyqtan da, týrızmniń osy salasyn respýblıka boıynsha jelilik uıymdastyrý mańyzdy», - dedi depýtat.