«Prezıdent myrza, BAQ-ty qoldaýyńyzdy suraımyz» — Ulttyq Quryltaı
QYZYLORDA. KAZINFORM — «Ádil sóz» halyqaralyq qorynyń prezıdenti Qarlyǵash Jamanqulova Qyzylordada ótip jatqan V Ulttyq quryltaıda Prezıdentten otandyq BAQ-qa qoldaý kórsetýdi surady.
— Aqparat salasynda da ózara baılanysty kúsheıtetin kez keldi. Bizde óńirlik deńgeıde jumys isteı alatyn medıaalańdar jetkilikti. Endigi maqsat — solardy júıeli jáne turaqty deńgeıge shyǵarý. Aımaqtyq deńgeıdegi medıaresýrstardy damytý arqyly óz narratıvterimizdi ózimiz qalyptastyrýǵa múmkindik alamyz. Strategııalyq kommýnıkatsııalardyń ishki saıasattaǵy mańyzy zor. Syrttan keletin aqparat kólemi kún saıyn artyp keledi. Al adamnyń ony túsinip, saraptaý múmkindigi shekteýli. Sol oqıǵalardyń narrtıvterin ózimiz aıqyndaı alýymyz qajet. Túsindirý logıkasyn ózgeler emes, ózimiz belgileýimiz qajet, — dedi Q. Jamanqulova Prezıdent qatysýymen ótken V Ulttyq quryltaıda.
Sonymen birge, Quryltaı múshesi strategııalyq kommýnıkatsııa arqyly medıasaýatty júıeli túrde kúsheıtý keregin aıtty. Óııtkeni medıasaýat — qoǵamdy syrtqy aqparattyq manıpýlıatsııalardan, kıberqaýipterden qorǵaýdyń quraly. Medıasaýaty bar azamat áleýmettik jelidegi jalǵan sózge ermeıdi.
Osyǵan qosa, otandyq BAQ pen kásibı jýrnalıstıkany qoldaý mańyzdy ekeni aıtyldy.
— Shynaıy, sapaly aqparatqa suranys azaıǵan joq. Otandyq BAQ birqatar qıyndyqqa qaramastan, óz jumysyn jemisti jalǵastyryp keledi. Osy oraıda, Prezıdent myrza, BAQ-ty qoldaýyńyzdy suraımyz. Siz 2022 jylǵy 16 naýryzdaǵy Joldaýyńyzda jýrnalısterdiń qaýipsizdigi máselesin kóterdińiz. Alaıda tájirıbe kórsetkendeı, Qylmystyq kodekstiń 158-baby (Jýrnalıstiń zańdy kásibı qyzmetine kedergi jasaý) jýrnalısterdi tolyqqandy qorǵaı almaı otyr. Osyǵan baılanysty quqyqbuzýshylyqtardyń bir bóligin ákimshilik jaýapkershilik sanatyna kóshirýdi usynamyz. Bul jýrnalısterdiń kásibı qyzmetin tıimdi qorǵaýǵa múmkindik beredi, — dedi qor basshysy.
Ulttyq quryltaıdyń V otyrysynyń mátin translıatsııasyn Kazinform saıtynan oqýǵa bolady.
Parlament reformasıa aıasynda áıelderdiń 30% kvotasyn saqtap qalý usynylǵany týraly jazdyq.