Jańa Parlamentte zań jobasy jyldam ári sapaly qabyldanady — Nurtaı Sabılıanov
ASTANA. KAZINFORM — Bir palataly Quryltaıda zań jobasy uzaq aınalymǵa túspeıdi jáne sapasyn joǵaltpaı-aq jyldam qabyldanady. Bul pikirdi Parlament Májilisiniń depýtaty Nurtaı Sabılıanov Jibek Joly telearnasyna bergen suhbatynda aıtty.
Jalpy Konstıtýtsııalyq ózgeristerde bir palataly Parlament qurý qarastyrylǵan. Munyń basty maqsaty — sapaly zańdardy shyǵarý jáne olardy ýaqyt talabyna saı, jyldam qabyldaý.
— Qazir Parlament Májilisi zańdy eki oqylymda qabyldap, Senatqa jiberedi. Óz kezeginde Senat ta eki oqylymda qabyldap, ózgerister men tolyqtyrýlar engizip, keri qaıtarýy múmkin, ıaǵnı oǵan kem degende eki aı ýaqyt ketedi. Májilis qaıtarylǵan zań jobasyndaǵy ózgeristermen kelispese, palatalar kelisim komıssııasyn qurady. Kelisim komıssııasy túsken usynystardy qarap, eki palatanyń otyrystaryna shyǵarady. Bul kóp ýaqytty alady. Máselen, biz maýsym aıynda zań jobasyn maquldap jiberetin bolsaq, Senattan zańymyz qazan aıynda bir-aq qaıtyp kelýi múmkin. Sondyqtan qazirgi aqparattyq tehnologııa zamanynda jyldamdyq basty talapqa aınaldy, ıaǵnı biz halyqtyń máselesin, óńirlerdiń máselesin ýaqytynda sheshýimiz kerek, — dedi N. Sabılıanov.
Spıker bul jańashyldyqtar arqyly depýtattardyń jaýapkershiligi artatynyn, Úkimet pen basqa memlekettik organdardyń eki palataǵa da kózqarasy birdeı bolatynyn aıtýda.
— Bir palataly Quryltaı jasaqtalsa, onda zań úsh oqylymda qabyldanady. Birinshi oqylymda onyń tujyrymdamasy qaralady. Ekinshi oqylymda — jan-jaqty talqylanyp, úshinshi oqylymda — Konstıtýtsııaǵa, ulttyq zańnamaǵa sáıkestigi qaralady. Halyqqa da bir palatadan baqylaý ońaı bolady, — dep atap ótti Májilis depýtaty.
Sonymen birge, N. Sabılıanov konstıtýtsııalyq reformalar halyqtyń ál-aýqatyn arttyrýdy kózdeıtinin atap ótti.
— Jańa jobada memlekettik qyzmettiń negizgi qaǵıdattary qarastyrylǵan. Ol egemendik pen táýelsizdikti qorǵaý, adamdardyń quqyqtary men bostandyqtaryn saqtaý, zań men tártip ústemdigin júrgizý jáne halyqtyń ál-aýqatyn arttyrý dep anyq jazylǵan. Oǵan qosa, Konstıtýtsııa jobasynda adam kapıtalyn, bilimdi, ǵylymdy, ınnovatsııany damytý — memlekettik qyzmettiń basty strategııasy dep kórsetilgen, ıaǵnı osy salalarǵa basty nazar aýdarylady. Ǵylym men bilimdi qarjylandyrý kóbeıtiledi. Jastarǵa jańa múmkindikter ashylady, — dedi Nurtaı Sabılıanov.
Aıta keteıik, búgin Memlekettik basqarý akademııasynda Jańa Konstıtýtsııanyń jobasy talqylandy.