Jańa Parlamentte depýtattar sany ózgerýi múmkin — Senat tóraǵasy
ASTANA. KAZINFORM — Senat tóraǵasy Máýlen Áshimbaev bir palataly Parlamenttiń qalyptasýyna qatysty pikir aıtty.
— Prezıdent Senattyń jumysyna joǵary baǵasyn berdi. Sońǵy 30 jylda elimiz úshin mańyzdy kezeńder bolǵany anyq. Osyndaı kúrdeli kezeńde Senat óziniń tarıhı mıssııasyn oryndady dep, Prezıdent naqty aıtty. Ótken jyldarda Senat memlekettiń qurylystyń turaqtanýyna tikeleı úlesin qosty. Sondyqtan, 30 jylda Senattyń jumysy óte tabysty ári nátıjeli boldy, memlekettiń damýyna kúsh-jigerin saldy. Ómir bolǵannan keıin, bizdiń saıası júıemiz damýy kerek, elimiz damyp jatyr. Osyny eskere otyryp, Memleket basshysy Joldaýda ary qaraı parlamenttik reformany júzege asyrý bastamasyn ortaǵa saldy. Bul rette, aldaǵy ýaqytta jańa bir palataly Parlamentti qalyptastyrý máselesi kóterildi. Muny elimizdiń damýy úrdisimen sáıkes keletin usynys dep qabyldadyq, — dedi Máýlen Áshimbaev Senattyń jalpy otyrysynan keıin tilshiler suraǵyna jaýap bere otyryp.
Osy oraıda ol osy mańyzdy máseleni sheshý úshin bir jyl boıy mamandar men sarapshylar, Parlament depýtattary talqylap, óz usynystaryn ortaǵa salatynyn aıtty.
— Ortaq pikirge kelse, 2027 jyly referendým uıymdastyrylady. Onyń barysynda halyq qandaı sheshim jasasa, ary qaraı tıisti zańnamalyq ózgerister engiziledi. Prezıdent eldiń bolashaǵyna qatysty máseleler, saıası júıege qatysty máseleler jalpyhalyqtyq talqylaý arqyly ǵana júzege asyrylýy kerek ekenine taǵy da atap ótti, — dedi Senat tóraǵasy.
Bul turǵyda ol referendým nátıjesinde jańa sapadaǵy Parlament qurýǵa jaǵdaı jasalyp otyrǵanyn atap ótti.
— Qazirgi kezde Senat mańyzdy fýnktsııalardy atqaryp keledi, ıaǵnı Ulttyq bank tóraǵasyn, Bas prokýrordy, Ulttyq qaýipsizdik komıtetiniń tóraǵasyn taǵaıyndaýǵa kelisim beredi, sondaı-aq Prezıdenttiń usynymynan keıin, Joǵarǵy Sot tóraǵasy men sýdıalaryn saılaıdy. Endi jańa Parlamentte qos palatanyń ókilettigi biriktirilýi múmkin. Sonymen qatar, jańa Parlamenttegi depýtattardyń sany týraly másele de talqylanady. Sebebi, depýtattar sanynyń ózgeretini túsinikti jaǵdaı, — dedi Máýlen Áshimbaev.
Aıta keteıik, 8 qyrkúıekte Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn jarııalady.
Prezıdent Qasym-Jomart Toqaev Qazaqstan halqyna Joldaýy barysynda bir palataly Parlament qurý týraly bastama kóterdi.
Memleket basshysy ótken 30 jylda Senat asa mańyzdy tarıhı mıssııasyn abyroımen atqaryp shyqqanyn aıtty.