Jańa parlament quramy ekonomıkalyq turǵyda bilimdi bolǵanyn qalaımyn - H.Baltaeva

ASTANA. QazAqparat - «Áıelderdiń respýblıkalyq keńesi» qoǵamdyq birlestiginiń basqarma tóraǵasy Hanzada Baltaeva Parlament Májilisi depýtattarynyń kezekten tys saılaýyn ótkizýdi qoldap otyr jáne jańa parlament quramy ekonomıkalyq turǵyda bilimdi bolǵanyn qalaıdy.

«Meniń oıymsha, bul bastama der ýaqytynda kóterilip otyr. Qıyn-qystaý kezeńde bul dana sheshim bolar edi. Biz kún saıyn álemniń tym názik bolyp bara jatqanyn ańǵaryp otyrmyz. Ekonomıka álsirep jatyr, ony boldyrmaý úshin Parlamenttiń kezekten tys saılaýyn ótkizgenimiz abzal. Depýtattarǵa osy bastamalary úshin alǵys aıtamyn. Menińshe, Memleket basshysy olardyń usynysyn qoldaıdy», - dep atap ótti ol tilshilerge bergen suhbatynda.

Onyń oıynsha, qazirgi Parlament Májilisi depýtattarynyń quramy osal bolmady.

«Ol jaman bolǵan joq, óziniń tarıhı mıssııasyn atqaryp shyqty. Osy ýaqyt aralyǵynda 80-ge tarta zań qabyldanyp, jańa komandanyń sátti jumys isteýine barlyq alǵysharttar jasaldy», - deıdi H. Baltaeva.

Qoǵamdyq birlestik basshysynyń pikirinshe, jańa Parlament jáne jańa Máslıhat depýtattary qoǵam ózgerisine jedel jaýap bere alatyn ekonomıkalyq bilimi bar adamdardan qurylýy tıis.

«Jańa jobalardy júzege asyrý turǵysynda jańa quram óte jedel bolýy tıis dep sanaımyn. Álemde oryn alyp jatqan oqıǵalarǵa jyldam jaýap qatýlary kerek. Onyń ekonomıkalyq bilimi birshama joǵary bolǵanyn da qalaımyn. Parlamentte kásipkerlerdi jıi kórgim keledi. Myqty ekonomıka - ol myqty kásipkerlik, sondyqtan kásipkerlik orta ózderiniń sózderin aıtyp qalýy tıis», - deıdi ol.