Jańa Parlament 5 jylǵa saılanady — Memleket basshysy
QYZYLORDA. KAZINFORM – Parlament qyzmetin túbegeıli qaıta qurý arqyly osyǵan deıin júzege asyrylǵan saıası reformalardy odan ári jalǵastyramyz. Bul týraly Ulttyq quryltaıdyń V otyrysynda Memleket basshysy Qasym-Jomart Toqaev málim etti.
- Usynystardyń tórtinshi bóligi zań shyǵarýshy organnyń jumys tártibi men rásimderine qatysty boldy. Jańa Parlamentte depýtattardy bes jylǵa saılaý kózdelip otyr. Zań qabyldaýdyń úsh kezeńnen turatyn protsedýrasy usynylady. Depýtattar birinshi kezeńde zań jobasyn jalpy maquldaıdy. Odan keıin ózgeristerdi maquldaıdy, sońynda zańdy qabyldaıdy. Osylaısha, biz Parlament qyzmetin túbegeıli qaıta qurý arqyly osyǵan deıin júzege asyrylǵan saıası reformalardy odan ári jalǵastyramyz, - dedi Qasym-Jomart Toqaev.
Prezıdenttiń aıtýynsha, memlekettiń ınstıtýtsıonaldyq tuǵyryn nyǵaıtyp, «Kúshti Prezıdent – yqpaldy Parlament – esep beretin Úkimet» qaǵıdatyna sáıkes ornyqty saıası júıe qalyptastyramyz.
- Basty maqsatymyz da – osy. Bılik ınstıtýttarynyń jańa qurylymy barshaǵa birdeı múmkindik beretin ádiletti qoǵam qurýdyń myzǵymas negizi bolmaq. Túptep kelgende, biz bir qoǵam bolyp qolǵa alǵan Parlamenttik reforma elimizdiń áleýetin arttyratyn bolady. Sonymen qatar áleýmettik-ekonomıkalyq ózgeristerdiń qarqynyn kúsheıtip, sapasyn jaqsarta túsedi. Men Memleket basshysy retinde buǵan kámil senemin, - dedi Memleket basshysy.
Prezıdent jańa Parlamentke «Quryltaı» degen ataý berýdi usyndy.
Sondaı-aq, ol bir palataly Parlament týraly bastamany halyq qoldap otyrǵanyn atap ótti.
Osydan buryn Toqaev jańa Parlamenttte depýtattar barlyǵyna birdeı ortaq tártippen saılanýy tıis ekenin aıtty.
Sonymen qatar jańa Parlamenttegi mandat sany 145 bolýy múmkin ekeni aıtyldy.