Jańa otandyq mýlthıkaıa qazaqstandyq búldirshinderge 2016 jyly jol tartady (FOTO)
ASTANA. QazAqparat - Astanada balalarǵa qazaq tilin úıretetin anımatsııalyq fılmniń tusaýy kesildi.
Stsenarıı avtory Rınat Súleımenovtiń aıtýynsha, «Jandos jáne onyń dostary» dep atalatyn jańa anımatsııalyq serıaldyń maqsaty - 5 jasqa deıingi balalarǵa qazaq tilin úıretý.
«Atalǵan teleónim Jandos esimdi bala týraly, ol kishkentaı kórermenderge qazaq tilin jáne tarıhyn úıretedi. Mýltfılm sıýjetteri óte qyzyqty», - deıdi R.Súleımenov. Túsirilim jumystaryn júrgizgen «SANA Media» kompanııasy ókilderiniń aıtýynsha, anımatsııalyq fılmdi jasaý úshin fılologtar, rejısserler, prodıýserler, stsenarıster jáne tanymal akterler tartylǵan. «Mýlthıkaıanyń ár serııasynda jańa bir oqıǵa aıtylady, ıaǵnı bir bólimi ekinshi bólimine táýeldi emes», - deıdi «SANA Media» JShS dırektory Quralbek Atamuratov. Jalpy, teleónim 50 serııadan turady jáne onyń árqaısysy naqty taqyryptarǵa negizdelgen. Ár serııanyń ýaqyty - 7 mınýt. Mýltfılm 2016 jyly respýblıkalyq arnalardyń birinen kórsetiledi, dep habarlaıdy skifnews.kz.
