Astyqtyń 777 myń tonnasy eksporttaldy

ASTANA. KAZINFORM — «Qazaqstan temir joly» UK» AQ aldyn ala málimetterine sáıkes, bıyl 1–25 qyrkúıek aralyǵynda astyqtyń jańa ónimin tasymaldaý kólemi 1 mln tonna, ótken jyldyń osy kezeńimen salystyrǵanda 14%-ǵa artty (878 myń tonna). 

Jalpy tasymal kóleminiń 258 myń tonnasy ishki suranysqa baǵyttalsa (2024 jyly — 155 myń tonna), 777 myń tonnasy eksportqa jóneltildi (ótken jyly — 723 myń tonna).

Aıta ketý kerek, kórshiles elderge astyq jetkizý kólemi artyp keledi: Máselen, Ózbekstanǵa — 31%-ǵa (250 myń tonnadan 327 myń tonnaǵa deıin), Tájikstanǵa — 15%-ǵa (116 myń tonnadan 133 myń tonnaǵa deıin), Qyrǵyzstanǵa — 42%-ǵa (6 myń tonnadan 25 myń tonnaǵa deıin), Ázerbaıjanǵa — 2 esege artyp, 12 myń tonnaǵa deıin jetkizildi.

Bul joǵary ónimdiliktiń, qazaqstandyq astyqqa syrtqy naryqtaǵy turaqty suranystyń jáne onyń ishinde temirjol kóligi qamtamasyz etip otyrǵan logıstıkalyq ınfraqurylymnyń tıimdiligin kórsetedi.

Aýyl sharýashylyǵy mınıstrligi agrarlyq sala ókilderin qoldaý, eksporttyq baǵyttardy keńeıtý jáne eldiń azyq-túlik qaýipsizdigin qamtamasyz etý boıynsha keshendi sharalardy jalǵastyryp jatyr. 

Aıta ketelik astyq óndirýshiler men eksporttaýshylardy memlekettik qoldaý sharalary uzartyldy.