Jańa óndiristik nysandarǵa birden 1 trln teńge kóleminde ınvestıtsııalar tartylady - Úkimet

ASTANA. KAZINFORM – Jalaqynyń ósý qarqyny bıznes tabysynyń, onyń ishinde óz kúshimen ári memlekettik qoldaý esebinen alynǵan tabys dınamıkasynan artta qalyp otyr. Bul týraly Úkimettiń keńeıtilgen otyrysynda Premer-mınıstr Oljas Bektenov málim etti.

- Atap aıtý kerek, azamattarymyzdyń tabys deńgeıiniń artýy ekonomıkanyń ósý qarqynyna sáıkes kelmedi. Eńbekaqynyń jalpy ishki ónimdegi úlesiniń kórsetkishi shamamen 30%-dan asyp tur, bul – Ortalyq Azııada joǵary kórsetkish. Biraq bizdiń maqsatymyz – álemdik ortasha kórsetkishke – 40%-ǵa jetý. Jalaqynyń ósý qarqyny bıznes tabysynyń, onyń ishinde óz kúshimen ári memlekettik qoldaý esebinen alynǵan tabys dınamıkasynan artta qalyp otyr. Osyǵan oraı Úkimet halyqtyń tabysyn arttyrý úshin keshendi sharalardy ázirlep jatyr, - dedi O. Bektenov.

Onyń aıtýynsha, osynyń aıasynda qarjylyq, salyqtyq jáne basqa da yntalandyrý sharalary kózdelgen. Olar eńbekaqyny kóterýge, laıyqty jalaqy tóleıtin jumys oryndaryn kóbeıtýge, kásibı daǵdylar men biliktilikti damytýǵa, sondaı-aq azamattar úshin qarjylyq júktemeni azaıtýǵa baǵyttalǵan.

- Ótken jyly Siz Qazaqstan halqyna Joldaýyńyzda ekonomıkanyń barlyq salasyna ozyq tehnologııalar men jasandy ıntellektini engizý jáne tsıfrlyq el bolý mindetin qoıdyńyz. Alaıda bul baǵytta iske asyrý jumystary tıisti deńgeıge jetken joq. Ekonomıkanyń naqty sektorynda tsıfrlandyrý protsesteri áli de bastapqy satyda. Áli kúnge deıin salalyq derekter qorlary tolyq qalyptaspaı otyr. Osy jáne basqa da máseleler «Digital Qazaqstan» strategııasynda sheshimin tabýǵa tıis. Ruqsat etseńiz osy taqyryp boıynsha meniń orynbasarym Jasulan Mádıev jan-jaqty baıandaıtyn bolady. Ekonomıkanyń qol jetkizilgen ósý jyldamdyǵy ınfraqurylymdy ozyq qarqynmen damytýdy talap etedi. Degenmen, arnaıy ekonomıkalyq aımaqtardyń ózinde ınfraqurylymmen ortasha qamtamasyz etý deńgeıi nebári 53%-dy, al ındýstrııalyq aımaqtarda bul kórsetkish 48%-dy quraıdy. AEA men IA-ny ınfraqurylymmen 100% qamtamasyz etý úshin qajetti sheshimder qabyldandy. Aldaǵy úsh jyl ishinde Islam Damý Banki qarajatyn tartý esebinen jańa óndiristik nysandarǵa qajetti ınfraqurylym salýǵa birden 1 trln teńge kóleminde ınvestıtsııalar tartylatyn bolady, - dedi Úkimet basshysy.

Aıta keteıik, Astanada Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.