Jańa oqýlyqtarǵa qatysty 4 myńnan astam eskertý men usynys tústi - BǴM
ASTANA. QazAqparat - Bıyl oqýshylarǵa arnalǵan jańa oqýlyqtar úlken qoǵamdyq baǵalaý men ǵylymı-pedagogıkalyq saraptamadan ótti, dep habarlaıdy QazAqparat QR BǴM saıtyna silteme jasap.
«3, 6, 8 synyptarǵa arnalǵan oqýlyqtardy oqý úrdisine engizý boıynsha QR BǴM tarapynan birqatar jumystar júrgizildi. Barlyq oqýlyqtar respýblıkanyń 30 pılottyq mektebinde ǵylymı-pedagogıkalyq saraptama men aprobatsııadan ótkizildi. Oqýlyqtardy qoǵamdyq baǵalaýdy uıymdastyrý boıynsha qyrýar jumystar atqaryldy», - delingen habarlamada.
Atalmysh oqýlyqtardyń jobalary «Oqýlyq» Respýblıkalyq ǵylymı-tájirıbelik ortalyǵynyń «Qoǵamdyq baǵalaý» portalyna ornalastyrylǵan. Kitaptarǵa qatysty ustazdar men men ata-analar qaýymdastyǵynan 4 myńnan astam eskertý men usynys kelip túsken. Mınıstrliktiń málimetinshe, Oqýlyqtardy jetildirý barysynda barlyq usynystar eskeriledi.
3, 6, 8 synyptarǵa arnalǵan oqýlyqtardyń mazmunymen pedagogtardy tanystyrý maqsatynda ótken jylǵy qarasha aıynda elimizdiń barlyq óńirlerinde ádistemelik semınarlar ótti. Atalmysh sharalarǵa oqýlyqtardyń 160 avtory men 7 myńnan astam muǵalim men ádisker qatysty. Kezdesýlerge qatysýshylar oqýlyqtardyń qurylymy men mazmuny boıynsha óz usynystary men eskertýlerin jetkizdi.
Oqýlyqtardyń sapasyn arttyrý úshin saraptama qorytyndysyn qarastyrý boıynsha qurylǵan pándik komıssııa quramy 120 adamǵa ulǵaıtylǵan. Komıssııaǵa Májilis depýtattary, qoǵamdyq uıymdardyń ókilderi kirdi. 3, 6, 8 synyptarǵa arnalǵan oqýlyqtar pándik komıssııalardyń eki otyrysynda qaraldy.
Oqýlyqtardyń lıngvıstıkalyq saraptamasy jáne áleýmettik qabyldanýyn qarastyrý maqsatynda QR BǴM alǵash ret jańa jumys tobyn uıymdastyryp, jumys tobyna oqý lıteratýrasynyń sarapshylary, úzdik muǵalimder men A.Baıtursynov atyndaǵy til ınstıtýtynyń qyzmetkerleri, jýrnalıster jáne qoǵam ókilderin, barlyǵy 74 adam múshelikke qabyldady.
