Jańa oqý jylyndaǵy mindet - memlekettik bilimniń jańa úlgisin sapaly oryndaý - Almaty qalalyq bilim basqaramasynyń bastyǵy Rahat Shımasheva
ALMATY. Tamyzdyń 25-i. QazAqparat /Názıra Eleýhan/ - Qala ákimdiginiń jáne bilim basqarmasynyń basty mindetteriniń biri mektepke deıingi uıymdar men orta mektepterdiń sanyn kóbeıtý. Tapshylyqtyń ornyn toltyrý úshin buryn satylyp ketken balabaqshalardy qaıtarý, mektep janynan jańa kishigirim ortalyqtar ashý, jalǵa berilgen ǵımarattardy alý syndy jumystar júrgizilýde. Bul týraly búgin Almatyda ótken bilim berý qyzmetkerleriniń tamyz keńesinde Almaty qalasy bilim basqaramasynyń bastyǵy Rahat Shımasheva aıtty,
dep habarlaıdy QazAqparat.
Onyń aıtýynsha, qalada 105 myń orynǵa arnalǵan 110 kishigirim ortalyqtar ashý josparlanýda.
Ol sonymen qatar, Almaty qalasynyń bilim oshaqtarynda qazaq tilin úırenýge erekshe nazar bólinip jatqandyǵyn atap ótti. «Sońǵy jyldarda qazaq tilinde bilim beretin mektepterdiń sany ósti. 2005-2010 jyl aralyǵynda 14 mektep ashyldy. Memlekettik tilde oqıtyn balalardyń sany da edáýir artyp, onyń sany 7000-ǵa jetti», dedi Rahat Shımasheva.
«Birinshi ret Jetisý aýdanynda balabaqshaǵa kezekke turýǵa arnalǵan elektrondyq tájirıbe júrgizilýde. Bul kezekke turý jaǵdaıynyń ashyq túrde bolýyna jáne jemqorlyqty joıýǵa septigin tıgizbek. 2014 jylǵa deıin biz balabaqshaǵa baratyn balanyń 70 paıyzyn qamtýdy josparlap otyrmyz. Qalada 139 memlekettik jáne 36 memlekettik emes balabaqshalar bar. 37 100 bala 175 balabaqshaǵa baryp jatsa da, áli 22 200 balaǵa oryn jetpeýde. Bul rette «Balapan» baǵdarlamasy boıynsha jańa balabaqshalar salynyp, qoldanysqa berilip jatqandyǵyn atap ótkim keledi», dedi ol.
Keńes barysynda bilim basqaramasynyń bastyǵy Rahat Shımasheva qalanyń bilim salasyndaǵy jetistikterimen bólisti. «Qalamyzdyń tórt mektep gımnazııasy elimizdegi eń úzdik 100 mekteptiń qataryna endi. 2010 jyly UBT-nyń ortasha baly 86,8 boldy, mektep túlekteriniń 80,3 paıyzy, 144 túlek «Altyn belgige» laıyq ekenderin dáleldedi. Bıyl bul kórsetkish ótken jylǵa qaraǵanda 10,3 paıyzǵa joǵary. Bıyl mekteptiń oqýshylary ár túrli olımpıadalar men ǵylymı jarystardyń 132 júldeli oryndaryna ıe boldy. Ǵylym, mýzyka jáne óner salasyndaǵy talantty, daryndy degen 99 oqýshy «Úrker» altyn belgisiniń ıesi atandy», dep atap ótti ol.
Onyń aıtýynsha, jańa oqý jylyndaǵy endigi mindet, memlekettik bilimniń jańa úlgisin sapaly oryndaý.
