Jańa oqý jylynda jańa kitaphana ashyldy
ALMATY. 1 qyrkúıek. QazAqparat /Ádilet Musahaev/ - Elbasynyń bıylǵy halyqqa Joldaýynda áleýmettik jańǵyrýdy qoǵam aldyndaǵy maqsat retinde qoıdy. Osy baǵytta joǵary oqý oryndarynyń róli erekshe.
Ýnıversıtetter qanshalyqty bilimdi, tolyqqandy básekege qabiletti mamandar daıyndaıtyn bolsa, soǵan baılanysty qoǵamymyz damıdy. Osy oraıda oqý jylynda stýdentterdiń bilim alyp, ǵylymı jumystaryn jetildirýge kitaphananyń, oqyrman zaldarynyń bilim nárimen sýsyndaýǵa kelgen jastarǵa tıgizer paıdasy óte zor. Búgin ál-Farabı atyndaǵy Qazaq ulttyq ýnıversıteti basshylarynyń qoldaýymen QazUÝ kolledjiniń stýdentterine arnalǵan ǵylymı kitaphanasynyń oqyrman zaly men abonementi saltanatty túrde ashyldy.
Ashylý rásimine QR Kásipodaqtar Federatsııasy jastar keńesiniń jáne Almaty qalalyq «Parasat» kásipodaǵynyń tóraǵasy Danat Janataev, QazUÝ «Parasat» kásipodaǵynyń tóraǵasy Talǵat Mekebaev, QazUÝ Ǵylymı kitaphana dırektory Gúljan Musaǵalıeva, rektor apparaty jetekshisiniń orynbasary Ábdiqahar Seıitjanov jáne kolledj dırektory Talǵat Moldahanov qatysty. QazUÝ-dyń ǵylymı kitaphanasynyń dırektory Gúljan Musaǵalıeva osy kolledj stýdentterine arnalǵan kitaphanany ashýǵa óte úlken úles qosyp otyr. Abonomentte 5000 dana kitap jáne birneshe jýrnal-gazet, jańa oqý-ádistemelik jınaqtar bar. Sonymen qatar oqyrmandarǵa arnaıy 160 oryny bar zal berilip otyr. Kitaphana barlyq sala boıynsha ádebıettermen qamtamasyz etilgen. Oqyrmandarǵa arnaıy elektrondyq kartoteka men katalogtardy qoldaný múmkindigine ıe. Jańa oqý jylynan bastap ál-Farabı atyndaǵy Qazaq ulttyq ýnıversıtetinde tolyq jańǵyrtý úrdisteri júrip jatyr. Bıylǵy oqý jylyna QazUÝ álemdik deńgeıdegi zertteý ýnıversıtetiniń úlgisin jasap jańǵyrtýdy júzege asyrýda.
Sonymen qatar, kolledjdiń 1-kýrs stýdentteri kýratorlarymen tanystyrylyp, alǵashqy sabaq bastalyp ta ketti.
