Jańa oqý jylynda jambyldyq oqýshylar 100 paıyz oqýlyqpen qamtylady
TARAZ. QazAqparat – Jambyl oblysynda jańa oqý jylynda 442 mektepke 240 myńnan asa oqýshy barady. 1 synypqa boljammen 22 327 oqýshynyń kelýi kútilýde, dep habarlaıdy QazAqparat tilshisi.
Búginde óńirdegi mekterge 21 603 bala qabyldanyp úlgergen. Bul týraly búgin óńirlik kommýnıkatsııalar qyzmeti alańynda ótken brıfıngide oblystyq bilim basqarmasy basshysynyń orynbasary Jámıla Bekbatyrova aıtyp berdi.
«Oblys mektepteri oqý úderisinde paıdalanatyn jumys qalpyndaǵy 52 797 dana kompıýtermen jabdyqtalǵan. Onyń ishinde: qashyqtyqtan oqıtyn balalardy kompıýterlik tehnıkamen qamtamasyz etý maqsatynda 2020 jyly jergilikti bıýdjet esebinen 4832 dana, respýblıkalyq bıýdjet esebinen 26 483 dana kompıýterlik tehnıka alynǵan»,- dedi Jámıla
Bekbatyrova.
Sonymen qatar, ótken jyly oblys boıynsha 1 kompıýterge keletin oqýshylar sany 8 oqýshyny qurasa, aǵymdaǵy jyly satyp alynǵan kompıýterlik tehnıkalar esebinen bul kórsetkish 4 oqýshyǵa jetken.
«Barlyq mektep «Kúndelik» aqparattyq júıesine qosylǵan. 2022-2023oqý jylyna oqýlyqtar men oqý-ádistemelik keshenderdi jáne qosymsha oqý quraldaryn satyp alý úshin 3,1 mlrd teńge qarjy bólindi. Jańa oqý jylynda oqýshylar oqýlyqtarmen 100 paıyz qamtamasyz etiledi dep josparlanýda. Búgingi kúni oqýlyqtardy baspadan tasymaldaý jumystary bastalǵan desek, ony 15 tamyzǵa deıin aıaqtaý kózdelip otyr»,-dedi spıker.
Bilim mekemelerinde balalardyń qaýipsizdigin qamtamasyz etý – basty másele. Osy maqsatta oblystaǵy mektepter men balabaqshalarda 100 paıyz beınebaqylaý kameralary ornatylypty.
Oblystaǵy 442 mekteptiń 47-de týrnıketter jáne Taraz qalasyndaǵy 18 mektepte dabyl túımesi bar. Sondaı-aq, 42 mektepke dabyl túımesi ǵımarattyń kireberisine jańadan ornatylady, oǵan 10 mln. 462 myń teńge qarjy qarastyrylyp otyr.
Mektepterde qaýipsizdik erejeleri bekitilip, onda mektepke kelýshilerdi tirkeý, qabyldaý, shyǵaryp salý reglamenti aıqyndalǵan. Ata-analar jáne bógde adamdar bilim nysanyna kirý kezinde vahta qyzmetinde mindeti túrde tirkeledi.
Jalpy oblys mektepterinde 795 vahter, 1366 mektep qaraýyldary jumys isteýde, barlyq mektepterde mamandandyrylǵan kúzetti uıymdastyrý múmkindikteri qarastyrylýda. Mektepter 100 paıyz ǵımarat ishindegi ájethanalarmen qamtamasyz etilgen.
