Jańa oqý jylynda Túrkistan qalasynda 900 oryndyq mektep ashylady
TÚRKІSTAN. QazAqparat - Jańa oqý jylynda Túrkistan qalasynda 900 oryndyq mektep ashylady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Túrkistan qalasyndaǵy qurylys alańdaryn aralaǵan oblys ákimi Ómirzaq Shókeev jasyl jelekti kútip-baptaý barysyn tekserdi. Jaýapty tulǵalarǵa naqty tapsyrmalar júktep, qurylys sapasyna basa nazar aýdarýdy mindettedi. Ákimshilik-iskerlik ortalyǵyndaǵy demalys aımaqtarynda jasyl jelekti kútip-baptaý men býlvardyń qurylysy júrgizilýde. Sonymen qatar, halyqaralyq áýejaıǵa barar jolda 400 myńǵa jýyq túrli aǵash otyrǵyzylǵan.
Oblys basshysy sondaı-aq Túrkistan qalasyndaǵy kópqabatty turǵyn úılerdiń qurylys barysymen tanysty. Ákimshilik-iskerlik ortalyqta 5, 7, 9, 12 jáne 20 qabatty 60 turǵyn úı jáne 4,6 jáne 8 qabatty 22 turǵyn úı boı kótergen. Aıta keteıik, jyl basynan beri túrkistandyq 500-ge jýyq otbasy qonys toıyn toılady. Onyń ishinde kezekke turǵan azamattarǵa 252 páter, nesıemen 204 páter berildi. Josparlanǵan 108 kópqabatty turǵyn úılerdiń 26-y tapsyryldy, qalǵan 82-i bıyl aıaqtalady.
Jańa oqý jylynda Túrkistan qalasynda 900 oryndyq mektep ashylady. Bilim uıasy zamanaýı qondyrǵylarmen jabdyqtalady. Úlken sport zal men pán synyptarymen qamtylǵan. Oblys ákimi jańa mekteptiń qurylys barysyn baqylap, merdigerlermen kezdesti. Qazir munda ishki qural-jabdyqtar ornatylyp, syrtqy abattandyrý jumystary júrgizilýde.
Túrkistan qalasyn túrki áleminiń mádenı-rýhanı ortalyǵy retinde qalyptastyrý jumystarynyń 1-kezeńi aıaqtalǵany belgili. Qalanyń negizgi áleýmettik-ınfraqurylymy qalandy. Jalpy 445,3 mlrd teńge 257 joba iske asyrylyp, jańadan halyqaralyq áýejaı, ákishilik-iskerlik jáne rýhanı-mádenı ortalyqtary salyndy, olardy ózara baılanystyratyn B.Sattarhanov dańǵyly qaıta qurýdan ótti jáne óndiristik aımaq quryldy. Rýhanı-mádenı ortalyǵyndaǵy 16 nysannyń 14-niń qurylysy tolyqtaı aıaqtaldy.
