Jańa oqý jylynda talapkerlerdi JOO-larǵa qabyldaý kvotasy bekitiledi
ASTANA. QazAqparat – Jańa oqý jylyna arnalǵan talapkerlerdi joǵary oqý oryndaryna qabyldaý kvotasynyń mólsheri bekitilýi múmkin. Bul týraly Ǵylym jáne joǵary bilim mınıstriniń buıyryq-jobasy «Ashyq» NQA portalynda jarııalandy, dep habarlaıdy QazAqparat tilshisi.
«Bekitilgen memlekettik bilim berý tapsyrysynan joǵary bilimniń bilim berý baǵdarlamalaryn iske asyratyn bilim berý uıymdaryna oqýǵa túsý kezinde qabyldaý kvotasynyń mólsheri bekitilsin», - delingen buıryq-jobasynda.
Qujatqa saı, jańa oqý jylynan bastap bilim berý uıymdaryna oqýǵa túsý kezinde qabyldaý kvotasy myna mólsherde bekitildi:
1. birinshi nemese ekinshi toptaǵy múgedektigi bar adamdar, bala kezinen múgedektigi bar adamdar, múgedektigi bar balalar arasynan shyqqan azamattar úshin – 1%;
2. basqa memleketterdiń aýmaǵyndaǵy urys qımyldarynyń ardagerleri, jeńildikter boıynsha Uly Otan soǵysynyń ardagerlerine teńestirilgen ardagerler úshin – 0,5%;
3. aýyldyń áleýmettik-ekonomıkalyq damýyn aıqyndaıtyn bilim berý baǵdarlamalary boıynsha oqýǵa aýyl jastary arasynan shyqqan azamattar úshin – 35%;
4. QR azamattary bolyp tabylmaıtyn ulty qazaq adamdar úshin – 4%;
5. jetim balalar jáne ata-analarynyń qamqorlyǵynsyz qalǵan balalar, sondaı-aq kámelettik jasqa tolǵanǵa deıin ata-anasynan aıyrylǵan nemese ata-anasynyń qamqorlyǵynsyz qalǵan jastar qataryndaǵy QR azamattary úshin – 1%;
6. QR Úkimeti aıqyndaǵan óńirlerge qonys aýdarǵan aýyl jastary arasynan shyqqan QR azamattary úshin – 5%;
7. kámeletke tolmaǵan tórt jáne odan kóp bala tárbıelep otyrǵan otbasylardaǵy balalar úshin – 5%;
8. keminde úsh jyl tolyq emes otbasy mártebesi bar otbasylardaǵy balalar úshin – 1%;
9. bala kezinen múgedektigi bar balalardy, birinshi nemese ekinshi toptaǵy múgedektigi bar adamdardy tárbıelep otyrǵan otbasylardaǵy balalar úshin – 1%.
Mınıstr buıryǵy 15 mamyrǵa deıin kópshilik talqylaýda bolady.
