Jańa oqý jylynda SQO mektepterine 350 jas maman qabyldaý josparlanǵan
SQO bilim basqarmasy baspasóz qyzmetiniń málimetinshe, oblystyń bilim berý júıesinde 16 myń pedagog jumys isteıdi. Bıyl olardyń qatary taǵy 350 jas mamanmen tolyǵady dep josparlanǵan. Olardyń 49-y búginge deıin Petropavl mektepterine ótinishterin berdi.
Petropavldaǵy № 5 orta mektepke 6 jas maman jumys isteýge keldi. Solardyń biri - Sara Jetpisbaeva balalarǵa qazaq tili men ádebıetten sabaq bermek. Dıplomyn jýyrda alǵan muǵalimge tájirıbeli ustaz ádistemelik kómek kórsetedi.
«Muǵalim bolý bala kezgi armanym. Ol úshin áýeli Maǵjan Jumabaev atyndaǵy joǵary pedagogıkalyq kolledjin támamdadym, bıyl Eýrazııalyq ulttyq ýnıversıtetine oqýǵa tústim, qashyqtan oqımyn. Maǵan orta býyn – 5-6 synypty berdi. Ustaz bolý ońaı emes, shydamdylyqty, tabandylyq pen qyzyǵýshylyqty talap etedi. Jaqsy maman bolýǵa tyrysamyn», - deıdi Sara Jetpisbaeva.
Orta mektepte qazir 61 ustaz eńbek etedi. Jańadan kelgen qazaq, orys, aǵylshyn tilderi jáne ózin-ózi taný pánderiniń muǵalimderi qosymsha synyptardyń ashylýyna oraı jumysqa qabyldanyp otyr.
«Bıyl jas mamandardy jumysqa qabyldaý tártibinde ózgeshelik bar. Olar qyzmetine kirispes buryn teorııalyq bilimin, pedagogıka men psıhologııa qabiletterin kórsetetin ulttyq biliktilik testileýinen ótedi, bul jaıynda sertıfıkat beriledi. Jalpy biz jas mamandarmen bir jylǵa kelisimge otyramyz. Olarǵa barynsha kómektesip, tájirıbeli mamandardy bekitip, jaqsy maman bolyp qalyptasýyna jaǵdaı jasaımyz», - deıdi mektep dırektory Irına Eltsova.
Bıyl SQO-da «hımııa – bıologııa», «fızıka-ınformatıka», «matematıka – ınformatıka», «geografııa – tarıh» mamandyqtary boıynsha alǵashqy mamandar daıarlandy. Sondaı-aq, Maǵjan Jumabaev atyndaǵy joǵary kolledjiniń 143 túlegi «aǵylshyn tilin biletin matematıka pániniń muǵalimi» «aǵylshyn tilin biletin bastaýysh synyp muǵalimi», «aǵylshyn tilin biletin mektepke deıingi uıymdardyń tárbıeshisi» mamandyqtary boıynsha dıplom aldy.
Jastardyń kóbi eńbek joldaryn aýyldarda bastamaq.