Jańa oqý jylynda Ózbekstan mektepterinde bilim berý aralas formada júrgiziledi
TAShKENT. QazAqparat – 2021-2022 oqý jylynda Ózbekstan mektepterinde bilim berý aralas formada jalǵasady, dep habarlaıdy QazAqparat menshikti tilshisi.
Ózbekstannyń Halyqqa bilim berý mınıstrliginiń málimetinshe, epıdemıologııalyq jaǵdaıǵa baılanysty keıbir mektepter jabylyp, qashyqtan bilim berýge kóshedi.
«Barlyǵyńyz biletindeı, elimizdegi, jalpy álemdegi koronavırýsqa shaldyqqandar sany ósip jatyr. Ókinishke qaraı, ótken jylmen salystyrǵanda naýqastar arasynda mektep jasyndaǵy balalar sany artýda. Osyǵan baılanysty Halyqqa bilim berý mınıstrligi 2021-2022 oqý jylynda mektepter aralas formada bilim berý júıesine daıyndalyp jatyr», - dep habarlady vedomstvodan.
Mınıstrlikte atap ótkendeı, «Onlaın-mektep» jobasy boıynsha qashyqtan bilim berýge arnalǵan vıdeosabaqtar jańa oqý jylynda da jalǵasady.
«Eldegi jaǵdaıdy esepke ala otyryp, Halyqqa bilim berý mınıstrligi dástúrli bilim berýdi tolyqtaı qalpyna keltirý úshin júıeniń barlyq qyzmetkerlerin tezirek vaktsına alýǵa shaqyrady. Eshqandaı zamanaýı qashyqtan bilim berý júıesi mekteptegi dástúrli bilim berýdiń ornyn basa almaıdy», - dep atap ótti Bilim berý mınıstrligi.
Eske salaıyq, Ózbekstan Densaýlyq saqtaý mınıstrliginiń statıstıkasyna sáıkes, sońǵy eki aptada elde koronavırýspen aýyrǵandar sany 2 esege, kúnine 427 adamnan 924-ke deıin ósip jatyr.
Avtory: Madıbek Jánibekov
