Jańa oqý jylynda oqýshylar qaýipsizdigi qalaı qamtamasyz etiledi

NUR-SULTAN. QazAqparat - Jańa oqý jylynyń bastalýyna da sanaýly ýaqyt qaldy. Oqý jyly qarsańynda qandaı sharalar qolǵa alynǵan, balalardyń quqyǵy qalaı qorǵalady – osy taqyrypty búgin Іshki ister mınıstrligi men Oqý-aǵartý mınıstrliginiń basshylary talqylady, dep habarlaıdy Polisia.kz.

Mınıstrlerdiń kezdesýine onlaın rejımde oblys ákimderiniń orynbasarlary, bilim basqarmalarynyń jáne óńirlerdegi polıtsııa departamentteriniń jetekshileri qatysty.

Kún tártibindegi taqyryp ózekti, Qazaqstan Prezıdentiniń erekshe baqylaýynda jáne múddeli memlekettik organdar, depýtattar, qoǵam belsendileri men úkimettik emes uıymdardyń kúsh biriktirýin qajet etedi.

«Tárbıesiz bergen bilim – adamzattyń qas jaýy» deıdi. Búgingi tańda biz 30 damyǵan memlekettiń qataryna kiremiz dep boljam jasap otyrmyz, oǵan jer qoınaýyndaǵy baılyqpen emes, adamı baılyqpen kiremiz. Ol búgingi ósip kele jatqan jasóspirimderge baılanysty. Sondyqtan osy máseleni biz óte muqııat qaraýymyz qajet. Nege Іshki ister organdarynda osyndaı jınalys jasap otyrmyz? Óıtkeni erteńgi qaýipsizdik, elimizdiń erteńgi tynyshtyǵy, erteńgi sapaly urpaq – búgin qalyptasady», – dedi ІІM basshysy Marat Ahmetjanov.

Kezdesýge qatysýshylar balalardyń qatysýymen bolatyn jol-kólik oqıǵalarynyń aldyn alý máselesin de qozǵady.

Mysaly, oqý jyly qarsańynda búkil el boıynsha «Nazar aýdaryńyz – balalar!» jedel aldyn alý is-sharasy bastaldy.

Ol jalpy joldaǵy qaýipsizdikti qadaǵalaýǵa, balalardy tasymaldaıtyn mektep avtobýstaryn baqylaýǵa múmkindik beredi.

«Qyrkúıek aıynan bastap 5 myńnan astam tergeýshi bizdiń mektepterge kelip, profılaktıkalyq maqsatta qajetti kezdesýler ótkizetin bolady. Bul máselege mektep dırektorlary men bilim bólimderiniń basshylary belsendi qatysady. Árıne, oqý jylynyń basynda biz ádette ishki ister organdaryna mektepter janyndaǵy kezekshilikti kúsheıtýdi uıymdastyrý, jolda arnaıy belgiler ornatý boıynsha júginemiz. Sondyqtan osy jumysty birlese otyryp, tıisti deńgeıde júrgizemiz dep oılaımyn», – dep atap ótti Oqý-aǵartý mınıstri Ashat Aımaǵambetov.

Sonymen qatar vedomstvo basshylary elordalyq jedel basqarý ortalyǵynda boldy.

Munda oqý-aǵartý mınıstrine mektepterde ornatylǵan kameralar men «dabyl túımeleriniń» múmkindikteri kórsetildi.

Qazirgi ýaqytta Qazaqstannyń 7386 mektebinde beınebaqylaý júrgiziledi.

Statsıonarlyq «dabyl túımeleri» elimizdiń 3514 mektebinde, «mobıldi túımeler» 1212 mektepte ornatylǵan. Bul jumys jalǵasyp jatyr.

Keńes qorytyndysy boıynsha ákimdikterge óńirlerdegi polıtseılermen birlesip, balalar men pedagogtarǵa túsindirý jumystaryn júrgizý boıynsha tapsyrma berildi.