Jańa oqý jylynda Nazarbaev Ýnıversıtetinde 2 myńnan astam stýdent oqıdy
ASTANA. 2 qazan. QazAqparat - Jańa 2013-2014 oqý jylynda Nazarbaev Ýnıversıtetinde bilim alýshylardyń sany 2 myńnan astam stýdentti quraıdy. Sonymen qatar, oqytýshy-professorlar quramyndaǵy adamdar sany 250-ge jetse, bıyl bilim ordasynda ýnıversıtet aldyndaǵy daıyndyq baǵdarlamasyna 536 tyńdaýshy, bakalavrıat baǵdarlamasymen - 48 stýdentti, magıstratýra men doktorantýraǵa - 126 stýdentti qabyldaǵan. Bul týraly atalmysh oqý ornynyń baspasóz qyzmetinen habarlandy.
Málimetterge qaraǵanda, bıyl ótken jyldardaǵydaı, oqýǵa túsýshiler arasynda Injenerııa mektebi men Ǵylym jáne tehnologııalar mektebin tańdaǵandar sany basym. Ol Mektepterde oqýǵa qabyldanǵandardyń 43 paıyzy bilim alady. Sonymen qatar, talapkerlerdiń qalǵan 14 paıyzy Gýmanıtarlyq jáne áleýmettik ǵylymdar mektebindegi mamandyqtar boıynsha oqıdy.
Budan bólek, Ýnıversıtet tikeleı bakalavrıat baǵdarlamasyna 48 adamdy qabyldaıdy, olardyń ishinde «Dublin Institute of Technology» jáne Sýleıman Demırel atyndaǵy ýnıversıtetterden eki stýdent aýysýǵa nıetin bildirip, Nazarbaev Ýnıversıtetinde bilimin jalǵastyrý týraly sheshim qabyldaǵan.
«2013 jyly Nazarbaev Ýnıversıtetinde úlken mańyzdy oqıǵa boldy. Biz tuńǵysh magıstrant-stýdentterdi qabyldadyq, al Joǵary bilim berý mektebinde alǵash doktorant-stýdentter oqýǵa qabyldandy. Biz úshin bul - úlken maqtanysh», - deıdi Nazarbaev Ýnıversıtetiniń Provosty Saımon Djons.
Aıta keterligi, Joǵary bilim berý mektebine bıyl 74 magıstrant jáne 12 doktorant qabyldandy. PhD baǵdarlamasyna túskenderdiń arasynda bir halyqaralyq stýdent - Meksıka azamaty da bar.
Joǵary bıznes mektebinde qazirgi tańda Executive MBA (basshylarǵa arnalǵan bıznes-basqarý) baǵdarlamasynda 18 adam bilimin shyńdaýda. Stýdentterdiń basty bóligi - iri qazaqstandyq jáne halyqaralyq korporatsııalardyń top-menedjerleri.
«Bıylǵy Nazarbaev Ýnıversıtetiniń tórtinshi akademııalyq jyly ekenin atap ótý qajet. Qazirgi tańda Ýnıversıtet 2015 jyly Medıtsına mektebin ashýǵa daıyndalýda jáne Taý-ken isi mektebin ashý jumystary jalǵasyn tabýda», - delingen baspasóz baıanynda.
