Jańa oqý jylynda 52 mektep jańadan iske qosyldy

ASTANA. QazAqparat – Jańa oqý jyly bastalar tusta 12 apattyq mekteptiń, 29 úsh aýysymmen oqıtyn bilim oshaǵynyń máselesi birjola sheshimin tapty, dep habarlaıdy QazAqparat tilshisi.

Oqý-aǵartý mınıstrliginiń deregi boıynsha, bıyl 260 mektepte kúrdeli jóndeý jumystary júrip jatyr. 1 qyrkúıekke deıin sonyń 194 nysanynda kúrdeli jóndeý aıaqtalýǵa tıis.

Sondaı-aq 1 qyrkúıekke deıin 65,6 myń orynǵa arnalǵan 52 mektep iske qosylady dep josparlanǵan. Al 2023 jyldyń sońyna deıin 66,4 myń orynǵa arnalǵan 102 mektep iske qosylýy kerek. Osylaısha 12 apattyq jáne úsh aýysymmen bilim beretin 29 mekteptiń máselesi sheshiledi.

22 tamyzdaǵy jaǵdaı boıynsha, mektepterdi ishki ister organdarynyń jedel basqarý ortalyqtaryna qosý kórsetkishi respýblıka boıynsha 98%-ǵa jetken.

Lıtsenzııalanǵan kúzet agenttikterimen kelisimshart ornatqan mektepterdiń úlesi de 98% bolyp otyr. Mektepterdi «dabyl túımelerimen» qamtamasyz etý deńgeıi de 98%-ǵa jetken.