Jańa oqý jylynda 30 mektepte bastaýysh bilim standarty ilki joba retinde synaqtan ótedi
ASTANA. QazAqparat - Nazarbaev zııatkerlik mektepteriniń bilim berý mazmunyn basqa jalpy orta bilim beretin mektepterge engizý úshin bastaýysh bilim berý standarty ázirlengen bolatyn. Bıylǵy oqý jylynan bastap elimizdiń 30 mektebinde osy standart ilki joba retinde aprobatsııadan ótedi.
Bul týraly búgin Nazarbaev zııatkerlik mektepteri pedagogtarynyń Tamyz konferentsııasy barysynda «Nazarbaev zııatkerlik mektepteri» AAQ Basqarma tóraıymy Kúlásh Shámshıdınova málim etti.
Qazirgi tańda oqýshylarǵa bilimmen qatar synı oılaý, bilimge daǵdylanýdy úıretý kerektigin alǵa tarta otyryp, K.Shámshıdınova aldymen NIZ oqýshylarynyń tildi meńgerý nátıjesine toqtaldy.
«IELTS emtıhanyn biz Brıtan keńesinde tapsyramyz. Bıyl emtıhan tapsyrǵan balalardyń ortasha baly 5,8. Bul rette aıta ketetin jáıt, jańadan ashylǵan mektepterde balalar eki jyl ǵana oqydy. Al, burynnan istep kele jatqan mektep oqýshylarynyń IELTS kórsetkishi 6,1 ball. Árbir ekinshi bala 6 baldan joǵary aldy. Nazarbaev zııatkerlik mektepterinen tapsyrǵan balalardyń 8,8 paıyzy 7-8 ball aralyǵynda boldy»,-deıdi ol.
«Ótken oqý jylynyń úlken bir jetistigi Y.Altynsarın atyndaǵy Bilim akademııasymen birlese otyryp jalpy birip beretin mektepterdiń bastaýysh synyptaryna arnalǵan standartty daıyndadyq. Bul standartty Bilim jáne ǵylym mınıstrligi talqylaýdan ótkizdi. Bıyl 30 jalpy bilim beretin 30 mektepke aprobatsııadan ótý bastalady. Soǵan baılanysty óte kóp jumys jasaldy. Atap aıtsaq, standartqa sáıkes, dırektorlardy oqytý máselesi, oqytýshylardy oqytý máselesi, tipti, oblystyq, qalalyq bilim basqarmalarynda jumys isteıtin mamandardy oqyttyq»,-dep tolyqtyrdy sózin K.Shámshıdınova.
Bul rette, standart aıasynda, standarttyń nátıjelerin baqylap otyrý úshin monıtorıng júrgizetin mamandar da oqytylǵan.
«Kez kelgen jańa dúnıe bastalǵanda, monıtorıng jasap otyrý kerek. Monıtorıng kóp jaǵdaıda esepke ketip qalady. Sondyqtan, biz 100-ge jýyq adamdy monıtorıngten ótkizý isine oqyttyq»,-dep túıindedi sózin K.Shámshıdınova.
