Jańa oqý jylynda 255 myńnan astam bala birinshi synypqa bardy
ASTANA. 1 qyrkúıek. QazAqparat - Búgin búkil respýblıka boıynsha 2,5 mln shamasyndaǵy oqýshy jańa oqý jylyn bastady, olardyń ishinde 255 myń bala tuńǵysh ret mektep tabaldyryǵyn attap otyr, dep habarlady pm.kz saıty.
QR Bilim jáne ǵylym mınıstrliginiń málimetterine qaraǵanda, 2012-2013 oqý jylyndaǵy oqýshylardyń jalpy sany 2 461 245 adamdy quraǵan, birinshi synypqa barǵandar sany 255 023 bala.
Jańa oqý jyly qarsańynda 25 myń oryndyq 61 mektep ashyldy. Elimizde barlyǵy 293 315 muǵalim jumys isteıdi.
Respýblıka boıynsha oqýlyqpen qamtamasyz etý 95 paıyzdan asady. 2012-2013 oqý jylynda 1,7 jáne 8 synyptar úshin qaıta basylyp shyǵarylǵan oqýlyqtar men oqý-ádistemeleý keshender oqý úrdisine engiziledi.
Qazirgi kezde qajetti ádistemelik jáne quqyqtyq baza daıyndaldy, oqýlyqtar satylyp alyndy, josparlanǵan nysandar paıdalanýǵa berildi, bilim berý mekemelerin kúrdeli jáne aǵymdaǵy jóndeýler aıaqtaldy.
Esterińizge sala keteıik, ústimizdegi jylǵy 14 tamyzdaǵy QR Úkimetiniń otyrysynda jalpy bilim beretin mektepterdiń jańa oqý jylyna daıyndyǵy máselesi talqylanǵan bolatyn.
