Jańa oqý jylynda 2 myń stýdent eńbek kúshi jetkiliksiz aımaqtardaǵy 7 JOO men 24 kolledjde bilim alady
ASTANA. QazAqparat - Jańa oqý jylynda 2 myń stýdent eńbek kúshi jetkiliksiz aımaqtardaǵy 7 JOO men 24 kolledjde bilim ala bastaıdy. Bul týraly búgin bilim berý qyzmetkerleriniń respýblıkalyq tamyz keńesinde QR Premer-Mınıstriniń orynbasary Gúlshara Ábdiqalyqova aıtty.
«Indýstrııalandyrý úshin kadrlardy daıyndaý júıesi jetildirilýde. Barynsha talap etiletin 20 mamandyq aıqyndalǵan. Úkimet kadrlardy daıyndaý boıynsha 10 JOO men 10 kolledj belgiledi. Olar damýdyń derbes baǵdarlamasy boıynsha jumys isteıtin bolady», - dedi vıtse-premer.
Onyń atap ótýinshe, óńirlerdegi mamandyqtardyń qajettiligin eskere otyryp bilim berý granttaryn qaıta bólýmen baılanysty ahýaldy retke keltirý jumystary jergilikti atqarýshy organdarmen birlesip júrgizilýde. Jumys kúshi mol aımaqtardyń jastaryn oqytý úshin jańa yntalandyrý tetikteri qarastyrylǵan.
«Jańa oqý jylynda 2 myń stýdent eńbek kúshi jetkiliksiz aımaqtardaǵy 7 JOO men 24 kolledjde bilim ala bastaıdy. Buǵan qosa, kolledjderdiń óndiristik ónerkásiptermen seriktestik kartasyn odan ary aıtarlyqtaı keńeıtip, dýaldy bilim berý qaǵıdattaryn keńinen qoldaný qajet», - dedi G.Ábdiqalyqova.
