Jańa oqý jylynda 12 jyldyq bilim berý boıynsha eksperıment Qazaqstannyń 104 mektebinde jalǵasady - QR Bilim jáne ǵylym mınıstrligi
ASTANA. 21 tamyz. QazAqparat - Búgin Astanadaǵy fızıka-matematıka baǵytyndaǵy «Nazarbaev Zııatkerler mektebinde» «Pedagogıkalyq ınnovatsııa: ázirleýden engizýge deıin» taqyrybynda jyl saıynǵy tamyz konferentsııasy ashyldy.
QR Bilim jáne ǵylym vıtse-mınıstri Mahmetqalı Sarybekov atalǵan alqaly jıyn barysynda jańa oqý jylynda 12 jyldyq bilim berý boıynsha eksperıment respýblıkanyń 104 mektebiniń 9-10 synyptarynda jalǵasatynyn aıtyp ótti. Osy oraıda ol bilim berý júıesin jańartýdyń mańyzdy quramdas bóligi 12 jyldyq bilimge kóshý ekenin jetkizdi. Búginde mınıstrlik tarapynan qajetti zańnamalyq baza ázirlenip, strategııalyq qujattar daıyndalǵanyn sóz etti.
Onyń paıymdaýynsha, halyqtyń úshten bir bóligin qamtyp otyrǵan bilim berýdiń alyp júıesin birden jańǵyrtý múmkin emes. Sondyqtan da ol Memleket basshysynyń tapsyrmasy boıynsha búginde ósim negizderi qurylǵanyn, bul Nazarbaev Zııatkerlik mektebi sekildi tájirıbelik alańdardy qamtıtynyn tilge tıek etti. M. Sarybekovtyń sózine qaraǵanda, osynda barlyq ınnovatsııalar qurylyp, qabyldanyp jáne ony mektepter júıesine engizý úshin taratý kerek.
Taratylǵan málimetterge qaraǵanda, konferentsııaǵa qatysýǵa elimizdiń barlyq óńirilerindegi Nazarbaev Zııatkerlik mektepteri jelisinen 150 muǵalim, bıylǵy oqý jylynda atalǵan mektepterde jumys isteıtin 165 sheteldik pedagog, sondaı-aq bul mekteptiń tájirıbesin taratý úshin Qazaqstan boıynsha bazalyq mektepter retinde iriktelinip alynǵan 35 mekteptiń ókilderi shaqyryldy.
