Jańa oqý jylynan bastap barlyq mektepterde Ózin-ózi taný atty jańa pán oqytylatyn bolady

Bul týraly búgin Almatyda "Bóbek" Ulttyq ǵylymı-tájirıbelik, saýyqtyrý ortalyǵynda ótip jatqan "Ózin-ózi taný" pániniń oqý tárbıe úderisindegi róli men orny. QR bilimdi uıymdastyrý: tájirıbeler men perspektıvalar" dep atalatyn konferentsııa barysynda aıtyldy, dep habarlaıdy QazAqparat.

Jobanyń bastamashysy Qazaqstannyń Birinshi hanymy Sara Alpysqyzynyń aıtýynsha, pánniń basty maqsaty - adamǵa óz-ózin tabýǵa kómektesý, boıyndaǵy eń jaqsy qabiletterdi ashý, jas urpaqtyń boıyna adamgershilik qaǵıdalaryn sińire otyryp, durys qalyptasýyna yqpal etý, bir sózben aıtqanda, "adam" bolyp qalyptasýyna kómektesý. "Balalardyń búgini men erteńi - bizdiń ortaq múddemiz. Biz bárimiz jáne árqaısysymyz qyzdarymyz ben uldarymyzdyń qandaı tańdaý jasaıtynyna jaýap beremiz. Olar jaqsylyq jolyna túse me, adamdarǵa kómegi tıe me? Bul ár ata-anany tolǵandyratyn suraq. Meniń oıymsha, bul pán ár balaǵa durys jol silteıtin, adamgershilik-rýhanı bilim beretin, ózin-ózi tanýǵa kómektesetin, durys tańdaý jasaýǵa yqpal etetin pán bolady", dedi Sara Nazarbaeva.

Konferentsııa jumysyna qatysýshy mamandardyń pikirinshe, memlekettiń eń qundy qazynasy - adam balasynyń ómirge degen kózqarasyn qalyptastyrýǵa arnalǵan bul pán onyń rýhanı múmkindikterin damytý, bala boıyndaǵy mádenıettilik - syndy izgi qasıetterdi dáripteýde óte tıimdi jáne bul pán damyǵan elderdegi bilim oshaqtarynda arnaıy pán retinde oqytý úrdisine aınalǵan. Al, bizdiń elimizde jańa pánniń oqý baǵdarlamasyna enýine «Bóbek» ǵylymı ortalyǵy bastamashy bolyp otyr.

Esterińizge sala ketsek, bul pán sońǵy 9 jyl ishinde elimizdegi birneshe bilim oshaǵynda tájirıbe retinde oqytylyp kele jatyr. Tájirıbe barysynda pedagogtar men oqýshylardyń jáne ata-analar tarapynan joǵary baǵaǵa ıe bolǵan. Bul pán boıynsha dáris alǵandar sany - 37 921 adamdy quraıdy. Oǵan elimizdiń ár aımaǵyndaǵy 184 bilim uıymdary qatysty. Onyń 70-i mektepke deıingi bilim uıymdary, 76-sy jalpy bilim beretin mektepter, 11-i balalar úıleri men ınternattar, 1-eýi kolledj, 26-sy joǵary oqý orny.

9 jyl ishinde 1000-nan asa ashyq sabaqtar men tárbıelik sharalar ótkizilgen. 120 túrli oqý- ádistemelik quraldar daıyndalyp, respýblıkalyq "Ózin-ózi taný" atty ǵylymı-ádistemelik jurnal shyǵýda. Qazir jańa pándi óndiriske engizýge qajet alǵysharttar daıyn. Eń birinshi - normatıvtik-quqyqtyq tujyrymdamasy jasalyp bekitildi. Oqý ádistemesi daıyndaldy.

Ózin-ózi taný ǵylymy - bul jalpy adamzattyq qundylyqtyń bastaýy.