Jańa oqý jylyna qatysty sheshilmegen máseleler bolǵan jaǵdaıda oǵan kinálylar jaýapqa tartylady - Úkimet basshysy
ASTANA. 16 tamyz. QazAqparat /Rýslan Ǵabbasov/ - Premer-Mınıstr Kárim Másimov Bilim jáne ǵylym mınıstri Baqytjan Jumaǵulovqa jańa oqý jylyna qatysty máselelerdi qadaǵalaýdy tapsyrdy.
Bundaı tapsyrmany Úkimet basshysy búgin selektorlyq rejımdegi Úkimet otyrysynda júktedi.
Úkimet basshysy jańa oqý jylyna daıyndyq sharalaryn únemi baqylaýda ustaý kerek ekenine toqtala kele, «jańa oqý jylyna 2 apta ǵana ýaqyt qaldy. Atap aıtqanda, barlyqtaryńyz bul saladaǵy kemshilikterdi bilesizder jáne olardy joıý boıynsha jumystardy der kezinde atqaryńyzdar»,-dedi. Osy oraıda K. Másimov Bilim jáne ǵylym mınıstri Baqytjan Jumaǵulovqa aldaǵy mindetter boıynsha sharalardy qadaǵalaýdy júktedi.
Úkimet otyrysy sońynda Premer-Mınıstr jańa oqý jyly aıasynda sheshilmegen máseleler bolǵan jaǵdaıda, qyrkúıektiń sońynda nemese qazannyń basynda barlyq jaýapty tulǵalar tıisti jaýapqa tartylatynyn eskerip ótti.
«Bul salada qandaı da bir jaǵdaılardyń týyndaýyna baılanysty shuǵyl áreket etý qajet»,-dep túıindedi Úkimet basshysy.
B. Jumaǵulovtyń málimetine qaraǵanda, bıylǵy jańa oqý jylynda respýblıka boıynsha 1-shi synypqa 260 myńnan astam oqýshy barady. Jalpy 1-shi qyrkúıekte Qazaqstanda jalpy 7 741 mekteptiń esigi ashylady. Jańa oqý jylynda respýblıkada 2,5 mıllıonnan astam oqýshy bilim alatyn bolady.
