Jańa oqý jylyna daıyn ba: Depýtattar stýdenttik jataqhanalardy tekserdi
Sonymen qatar olar Sátbaev Ýnıversıtetiniń jataqhanalarynyń jańa oqý jylyna daıyndyǵyn tekserdi, dep habarlaıdy QazAqparat QR Ǵylym jáne joǵary bilim mınıstrliginiń baspasóz qyzmetine silteme jasap.
Monıtorıng barysynda stýdentterdi jataqhanalarǵa kedergisiz ornalastyrý máseleleri talqylandy.
- Bul kóptegen qıyndyqtar men táýekelderge toly, jan-jaqty qarastyrýdy talap etetin óte kúrdeli másele jáne aldaǵy ýaqytta da jataqhana máselesi basty nazarda bolady. Ózderińiz biletindeı, soltústik óńirlerde óte myqty, óte sapaly joǵary oqý oryndary bar, alaıda barlyq stýdentter Almatyǵa kelýge tyrysady. Al mundaǵy JOO jataqhanalarynda bilim alýshylar úshin jetkilikti oryn bolmaýy múmkin. Sondyqtan bizge sanıtarlyq normalarǵa, ınfraqurylym, stýdentterdiń qaýipsizdigi, bıýdjet boıynsha belgili bir talaptarǵa saı stýdenttik jataqhanalar qajet. Osynyń bárin qarastyryp, stýdentterdiń turǵylyqty jerin qamtamasyz etý kerek, —dedi Irına Smırnova.
Qazirgi ýaqytta Sátbaev Ýnıversıtetinde 2075 oryndyq 5 jataqhana men jas ǵalymdar úıi bar. Sonymen qatar, 616 oryndyq 7 jataqhanamen memorandýmǵa qol qoıyldy. Qosymsha 1999 oryn alý úshin taǵy birneshe jataqhanalarmen kelissózder júrgizilýde.
Búgingi kúni ýnıversıtetke jataqhanadan oryn alýǵa 2400 ótinish kelip tústi. Oryndardy bólýdi komıssııa qatań tártippen júzege asyrady. Stýdentterge táýlik boıy isteıtin arnaıy qurylǵan Ahýaldyq ortalyq kómek kórsetedi. Іs-sharanyń ashyq júrgizilýin stýdenttik dekanat jáne Ombýdsmender qamtamasyz etedi.
- Barlyq joǵary oqý oryndary bul máseleni sheshýge bar kúshterin salýda, Ahýaldyq ortalyqtar 24/7 jumys isteıdi. Olar ótinimderdi elektrondy formatta qabyldap, stýdenttermen tikeleı kezdesý ótkizedi. Tipti Siz basqa JOO stýdenti bolsańyz da dalada qalmaý jolyn tabý úshin kez kelgen JOO -ǵa kelip, keńes alýǵa bolady. Barlyq stýdenttik elshiler osy jaǵdaıdy sheshý úshin ózara baılanys ornatyp, is-sharalar júrgizedi, - dep qorytyndylady Májilis depýtaty.
