Jańa oqý jylyna arnalǵan oqýlyqtar pándik komıssııa qaraýynda boldy
ASTANA. QazAqparat - L.Gýmılev atyndaǵy Evrazııa ulttyq ýnıversıteti bazasynda Pándik komıssııalardyń jumysy júrgizildi. Ata-analar men oqýshylardyń kóptegen aryz-shaǵymynan soń, memlekettik qyzmetkerler arnaıy komıssııa qurdy. Olar barlyq kitaptardyń mektep baǵdarlamasyna sáıkestiginen bastap, árip qatelerine deıin tekserý mindetin óz moıyndaryna aldy.Bul jumysqa «Oqýlyq» respýblıkalyq ǵylymı-tájirıbelik ortalyǵy júrgizgen ǵylymı-pedagogıkalyq saraptamanyń jumys nátıjesi qabyldandy.
Komıssııa jumysynyń obektıvtiligin jáne ashyqtyǵyn qamtamasyz etý maqsatynda Pándik komıssııalar quramy anaǵurlym keńeıtilip, nyǵaıtyldy. 17 pándik komıssııa quryldy jáne olardyń quramynda bilim berý salasyndaǵy 126 bilikti mamandar boldy. Sonymen qatar komıssııa quramyna Qazaqstan Respýblıkasy Parlamenti Májilisiniń depýtattary, úkimettik emes uıymdardyń ókilderi de endi.
Bilim jáne ǵylym mınıstrligi ókilderiniń sózine súıinsek, tarıhta alǵash ret Pándik komıssııanyń quramy 40 adamǵa deıin keńeıtildi. Buǵan deıin ne bary 13 adam jabyq túrde ótkizip, ózderiniń sheshimderin jarııalaıtyn. Osy jolǵy komıssııa quramynda ár óńirden kelgen ustazdar, mektep dırektorlary, ǵalymdar, Birǵanym Áıtimova, Bekbolat Tileýhan, Jambyl Ahmetbekov t.b. qatarly Senat pen Májilis depýtattary boldy. Al kitaptardy, oqýlyqtardy jaryqqa shyǵarý úshin otandyq ta, sheteldik te baspalar arasynan 12 baspa qatysty.
Sonymen qatar Pándik komıssııa elimizdiń 16 oblysynda jasalǵan pedagogıkalyq saraptama nátıjelerin,sol sekildi, elimizdiń 30 mektebinde ótkizilgen aprobatsııa, mektepke deıingi tárbıe jáne oqytý deńgeıine arnalǵan 1010 atalym oqý ádebıetteri, 2, 5 jáne 7 synyptarǵa arnalǵan oqýlyqtar men oqý-ádistemelik keshender, arnaıy (korrektsııalyq) mektepterge oqý ádebıetteri, qosymsha ádebıetter jáne elektrondyq tasymaldaǵyshtardaǵy oqý basylymdary usynyldy. Sonyń ishinde 197-si oqýlyq. Naqtyraq aıtsaq, 2-synypqa arnalǵan 62 oqýlyq, 5-synypqa - 63 jáne 7 synypqa - 72 oqýlyq qaraldy.
Oqýlyqtardyń qaralý ústindegi jobalary «Oqýlyq» ǴTO-nyń resmı saıtynda jarııalanǵan.
Pándik komıssııa músheleri oqýlyqtardy synaqtan ótkizý men qoǵamdyq baǵalaý qorytyndylaryn jáne ǵylymı-pedagogıkalyq saraptama nátıjelerin taldap, Respýblıkalyq komıssııa qaraýyna bilim berý uıymdarynda paıdalanýǵa usynylatyn oqý ádebıetteri jóninde usynystaryn engizdi.
Komıssııa jumysyna Qazaqstan Respýblıkasy Parlamenti Senatynyń jáne Májilisiniń depýtattary, memlekettik organdardyń ókilderi, oblystyq bilim basqarmalarynyń basshylary, ǵalymdar, mektep dırektorlary jáne muǵalimderi, sonymen qatar pándik komıssııalardyń músheleri qatysty.
Respýblıkalyq jáne pándik komıssııalar 2-synypqa arnalǵan biryńǵaı bazalyq oqýlyqtar, 5 jáne 7-synyptarǵa arnalǵan balamaly oqýlyqtar men oqý-ádistemelik keshenderdi, mektepke deıingi tárbıe jáne oqytý deńgeıine, arnaıy mektepterge arnalǵan oqý basylymdaryn jáne baska da qosymsha ádebıetterdi iriktep aldy.
Ár pán boıynsha 2, 5, 7 -synyptar úshin oqý-ádistemelik qural, oqý-ádistemelik keshen, oqýlyqtarǵa júrgizilgen ekspertıza nátıjeleri qaralatyn Pándik komıssııa jumys istep jatqan L.Gýmılev atyndaǵy Eýrazııa Ulttyq ýnıversıtetine Qazaqstan Respýblıkasy Bilim jáne ǵylym mınıstri Erlan Saǵadıev qatysty. Mınıstr OMK, OMQ, oqýlyqtarǵa jasalyp jatqan ekspertızanyń 3-kezeńiniń ótkizilý barysymen tanysyp shyqty.
Otyrysqa qatysýshylar oqý ádebıetterin ázirleýdi, saraptaýdy jáne irikteýdi ári qaraı jaqsartý úshin naqty usynystaryn jasady.
