Jańa oqý jyly: Kezekshi synyptardaǵy daıyndyq qalaı júrip jatyr

NUR-SULTAN. QazAqparat – Elimizdegi epıdemıologııalyq jaǵdaıǵa baılanysty jańa oqý jyly dástúrli formatta bastalmaıdy. Degenmen, ata-ananyń tańdaýyna qaraı, 1-4 synyp oqýshylary úshin mektepte kezekshi synyptar bolady. Álıhan Bókeıhanov atyndaǵy №76 mektep lıtseıi de jańa oqý jylyna daıyndalyp jatyr. Osy oraıda mektep basshylyǵy sanıtarlyq-epıdemıologııalyq talaptardy oryndaý men kezekshi kabınetterdiń daıyndyǵy týraly baıandap berdi.

«Bastaýysh synyptarǵa kezekshi toptarda Ata-ananyń kelisimi boıynsha oqytýdy uıymdastyrý ruqsat etilgen. Qazirgi kezde mekteptegi bastaýysh synyptaǵy oqýshylardyń 453-i, ıaǵnı 60 paıyzǵa deıingisi kezekshi synyp toptarynda oqýǵa ótinish jazyp otyr. Mektep kezekshi synyptardy qabyldaýǵa da, qashyqtan oqytýǵa da tolyq daıyn dep aıtýǵa bolady», - dedi mektep dırektory Sapýra Tólekova.

Onyń sózine qaraǵanda, mektepte oqýshylar men eresekterdiń qaýipsizdigin qamtamasyz etetin barlyq sanıtarlyq sharalar qarastyryldy. Osy oraıda sanıtaızerler, antıseptıkter, túrli bakterıaldy sabyndar, teplovızorlar, dezınfektsııalyq tósenishter satyp alyndy.

«Maska men qolǵaptar bar. Kezekshi toptarda oqýshylar sany 15-ten aspaýy kerek. Sondyqtan barlyq kabınetterdegi oryndar tek 15 balaǵa laıyqtalyp daıyndaldy. Mekteptiń ishindegi áleýmettik qashyqtyqty balalar umytpaı saqtaýy úshin arnaıy belgiler qoıyldy. Sonymen qatar, mektepke kirgizý men shyǵaryp alýda ártúrli esikter qarastyryldy, óıtkeni úzdiksiz qabyldaý júredi. Oqýshylar 15 mınýttyq aralyqpen qabyldanady, ıaǵnı tańerteń saǵat 8:00-de bir synyptyń 15 balasyn qabyldaý bastalsa, kelesi synypty 15 mınýttan keıin qabyldaımyz. Sabaqtardyń arasyndaǵy úzilister de ár synypqa ártúrli belgilenedi. Osy oraıda mektep dálizinde bir ýaqytta oqýshylar kóptep shoǵyrlanbaıdy», - dedi mektep dırektory.

Kezekshi synyptarǵa muǵalimderdi irikteýdiń tıisti talaptary eskerilgen. Bul turǵyda muǵalimniń kelisimi bolýy kerek. Odan keıin pedagogtyń jasy nazarǵa alynady, jasy úlken ári sozylmaly aýrý bar, dárigerlik esepte turǵan muǵalimder kezekshi synyptarǵa sabaq berýge tartylmaıdy.

«Kezekshi synyptar bolǵan ýaqytta eresekter sanyn barynsha azaıtamyz. Tek qana pedagogtar, tazalyqqa jaǵdaı jasaıtyn jumyskerler, sondaı-aq balalardyń qaýipsizdigine jaýapty muǵalimder ǵana bolady. Bir synypta bir muǵalim jumys isteýi kerek degen qaǵıda saqtalady. Kezekshi synyptarda tek negizgi pánder oqytylady, qalǵan pánder onlaın formatta qashyqtan júrgiziledi», - dedi S. Tólekova.

Tańerteń balalardy qabyldap alý mekteptiń syrtyndaǵy qorshaýdan iske asyrylady.

«Balada dene qyzýy anyqtalsa, birden ata-anasymen qaıtarylady. Bala mekteptiń aldyndaǵy arnaıy araqashyqtyq belgileri arqyly kiredi. Sabaq barysynda balada dene qyzýy, jótel baıqalsa, onda arnaıy medıtsınalyq kabınet janynan oqshaýlaý bólmesi jabdyqtalǵan. Sol oqshaýlaý bólmesinde bala jedel járdem nemese ata-anasy kelgenshe bolady», - dedi ol.