Jańa oqý jylynda jeke qaýipsizdik sabaqtary qaıta júrgiziledi
ASTANA. KAZINFORM — 1 qyrkúıekten bastap elimizdiń barlyq bilim berý uıymdarynda jeke qaýipsizdik sabaqtary qaıta bastalady. Bul týraly Oqý-aǵartý mınıstrliginiń baspasóz qyzmeti habarlady.
Bul sabaqtar balalardyń túrli ómirlik jaǵdaılarda durys áreket etýge qajetti praktıkalyq daǵdylaryn qalyptastyrýǵa jáne jeke qaýipsizdikke jaýapkershilikpen qaraýyn damytýǵa baǵyttalǵan.
Sabaqtar balabaqshalardan bastap kolledjderge deıin bilim berýdiń barlyq deńgeıin qamtıdy. Ár jas ereksheligine sáıkes bólek blok ázirlengen:
•balabaqsha — jedel qyzmet nómirlerin bilý, oıyn jáne demalys alańdaryndaǵy qaýipsizdik erejeleri;
•bastaýysh synyptar — sýdaǵy jáne muzdaǵy qaýipsizdik, beıtanys adamdarmen kezdeskende ózin ustaý, qańǵybas ıtterden qorǵaný;
•orta býyn synyptary — býllıng pen kıberbýllıng, qaýipti ınternet-áýestenýler, beıtanystardyń usynystarynan bas tartý, óz is-áreketine jaýapkershilikti qalyptastyrý;
•joǵary synyptar men kolledjder — qarjylyq saýattylyq, alaıaqtardan qorǵaný, onlaın-oıyndardaǵy táýekelder, eńbek qaýipsizdigi, óz quqyqtary men mindetterin bilý, jeke áreketteri úshin jaýapkershilik.
Sabaqtar ár aptada synyp saǵaty aıasynda 10 mınýttan ótkiziledi jáne taqyryptar jylyna úsh ret qaıtalanady.
Baǵdarlamany iske asyrý barysynda úsh kezeńdi monıtorıng júrgizildi. Onyń ishinde pedagogter men psıhologtarǵa arnalǵan keńester men vebınarlar uıymdastyryldy, sondaı-aq polıtsııa, TJM jáne densaýlyq saqtaý ókilderi tartyldy. Anketa alý, jobalar, beınerolıkter jáne ózge de ınteraktıvti ádister qoldanyldy.
— Tájirıbe kórsetkendeı, mundaı sabaqtar balalardyń mazasyzdyǵyn tómendetip, qaýipsiz minez-qulyq daǵdylaryn qalyptastyrady jáne olardy ómirdegi, onlaın ortadaǵy kúrdeli jaǵdaılarda durys áreket etýge úıretedi, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.
Eske sala keteıik, jeke qaýipsizdik sabaqtary 2023–2025 jyldarǵa arnalǵan balalardy zorlyq-zombylyqtan qorǵaý, sýıtsıdtiń aldyn alý jáne olardyń quqyqtary men salamattylyǵyn qamtamasyz etý jónindegi keshendi jospar aıasynda engizilgen.
Aıta ketelik jańa oqý jylynda 30 myńnan astam pedagog biliktiligin arttyrady.