Jańa oqý jylynda stýdentterge arnalǵan jataqhana máselesi sheshile me
ASTANA. KAZINFORM - QR Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jataqhana qurylysyna qatysty túsinik berdi.
«2023 jylǵy 1 qyrkúıekten bastap Zańnyń normasy kúshine endi, onda joǵary oqý ornyna qabyldanǵan barlyq bilim alýshylardy jataqhanalarmen qamtamasyz etý kózdelgen. 2023-2029 jyldarǵa arnalǵan Joǵary bilimdi jáne ǵylymdy damytý tujyrymdamasyna sáıkes jyl saıyn 10 myń jataqhana ornyn qosý eskerilgen», - delingen vedomstvonyń Kazinform agenttigine bergen jaýabynda.
Máselen, 2018-2023 jyldary 50 966 oryndyq 211 jataqhana, onyń ishinde 34 296 orynǵa arnalǵan 128 jataqhana joǵary oqý oryndarynyń stýdentteri úshin, 16 670 oryndyq 83 jataqhana kolledj stýdentterine tapsyryldy.
2024 jylǵa arnalǵan josparda 10 576 orynǵa eseptelgen 27 jataqhanany paıdalanýǵa berý qarastyryldy. Sonyń arasynda JOO stýdentterine 8 473 oryn (19 jataqhana), Tehnıkalyq jáne kásiptik bilim berý uıymdary stýdentterine 2 103 oryn (8 jataqhana) eskerilgen.
«Stýdenttik jataqhanalarda oryn tapshylyǵy máselesin sheshý maqsatynda Mınıstrlik tıisti sheshimder qabyldady. QR Úkimetiniń 2023 jylǵy 30 qarashadaǵy bekitilgen Áleýmettik saladaǵy memlekettik-jekeshelik áriptestikti damytýdyń 2024-2028 jyldarǵa arnalǵan tujyrymdamasyn asyrý úshin stýdenttik jataqhanalar salý boıynsha baǵdarlamalyq memlekettik-jekeshelik áriptestikti engizý boıynsha jumys atqarylyp otyr. Mınıstrlik Almaty jáne Astana qalalaryndaǵy memlekettik JOO-lardyń jataqhanaǵa arnalǵan ǵımarattaryn rekonstrýktsııalaýǵa qatysty máselelerdi pysyqtady. Rekonstrýktsııalaý barysynda memlekettik tapsyrystyń mólsherin jylyna 1 oryn úshin 92 AEK-ten 182 AEK-ke deıin ulǵaıtý jolymen memlekettik tapsyrystyń qoldanystaǵy tetigin jetildirý boıynsha jumys jalǵasyp jatyr. Memleket basshysynyń tapsyrmasy boıynsha Ál-Farabı atyndaǵy Qazaq ulttyq ýnıversıteti úshin «QazUÝ-grad» jáne L.N. Gýmılev atyndaǵy Eýrazııa ulttyq ýnıversıteti úshin «EUÝ-grad» salý máselesi pysyqtalyp otyr», - dep atalyp ótken komıtet aqparatynda.
