Jańa oqý jylynda Qyzylordada qansha mektep ashylady
QYZYLORDA. KAZINFORM — Aldaǵy jańa oqý jylynda Qyzylorda oblysy boıynsha 17 423 bala 1-synypqa barady.
Sondaı-aq óńirde jańa mektepterdiń qurylysy qyzý júrip jatyr. Oblystyq bilim basqarmasy málimdegendeı, «Jaıly mektep» ulttyq jobasy aıasynda 6 900 oryndy qamtıtyn 10 mektep salynady.
— Bıyl 3 myń oryndy 6 mektep paıdalanýǵa berildi. Jańa oqý jylynda 3 900 oryndy 4 bilim oshaǵy balalarǵa esigin aıqara ashady. Atap aıtqanda, Qyzylorda qalasynyń SPMK-70 shaǵynaýdanynda — 1500, Qyzyljarma shaǵynaýdanynda — 600, Araı shaǵynaýdanynda — 1500, Aral aýdanynyń Sekseýil kentinde — 300 orynǵa arnalǵan oqý ordalary. Qalalyq, aýdandyq bilim bólimderi onda bilim alatyn balalardyń tizimin jasap, oqý-tárbıe protsesin bastaýǵa qajet uıymdastyrý sharalaryn qolǵa aldy, — delingen habarlamada.
Budan bólek, Aral aýdanynyń Jalańash eldi mekeninde de 150 oryndy jańa mekteptiń qurylysy qarqyndy.
Buǵan deıin habarlaǵanymyzdaı, Aqtóbe oblysynda «Keleshek mektepteri» jobasy aıasynda 4 mektep ashylyp, 2 jeke mektep qabyldaý júrgizedi.