Jańa oqý jylynda Qyzylordada qansha bala 1-synypqa barady
QYZYLORDA. KAZINFORM – Jańa oqý jylynda Qyzylorda oblysynda 17 myńnan astam bala tuńǵysh ret mektep tabaldyryǵyn attaıdy.
Oblystyq bilim basqarmasy ol úshin 2025 jyldyń 1 sáýiri men 31 tamyzy aralyǵynda qujat qabyldanatynyn málimdedi. Bilim týraly zańǵa sáıkes balalar birinshi synypqa 6 jastan bastap ata-analardyń ótinishi boıynsha qabyldanady.
— Qujattardy eGov mobile qosymshasy men elektrondy úkimet portaly arqyly, sondaı-aq qaǵaz túrinde — tikeleı mektepterge tapsyrýǵa bolady. Ol úshin barlyq mektepte qabyldaý komıssııalary jumys isteıdi, — delingen basqarmanyń habarlamasynda.
Bıyl eGov portalynda qujat tapsyrý rásimi jeńildetilgen. Endi ata-analarǵa medıtsınalyq anyqtamalardy qolmen júkteýdiń qajeti joq. Bala densaýlyǵy pasporty men profılaktıkalyq ekpe kartasyndaǵy málimetter avtomatty túrde alynady. Eger medıtsınalyq anyqtamalar júıede bolmasa, olardyń skan-kóshirmelerin júkteýge bolady. Sondaı-aq ótinishtiń mártebesin qaraý jáne ony bir batyrmamen keri qaıtarý múmkindigi qarastyrylǵan.
Basqarma ókilderi ótinish mereke jáne demalys kúnderin qospaǵanda dúısenbiden jumaǵa deıin qabyldanatynyn jetkizdi. Suranys jiberilgennen keıin ótinish 1 jumys kúni ishinde qaralady.
Qyzylorda oblysynda 2024-2025 oqý jylynda da 17 myńnan astam bala 1-synypqa qabyldandy. Onyń 93,1%-ǵa jýyǵy memlekettik tilde oqýǵa nıet bildirgen bolatyn.
Búgin Aqtóbe oblysynda eki «jaıly mektepte» oqý bastaldy.