Jańa oqý jylynda dýaldy oqýmen qamtylǵan stýdentter sany 27 myńǵa artady
ASTANA. KAZINFORM — 2025–2026 oqý jylynda tehnıkalyq jáne kásiptik bilim berý uıymdarynda dýaldy oqýmen qamtylǵan stýdentter sany 135 myńǵa jetedi. Bul ótken jylmen salystyrǵanda 27 myńǵa kóp. Bul týraly Oqý-aǵartý mınıstrliginiń baspasóz qyzmeti habarlady.
Dýaldy oqytý teorııalyq daıyndyqty tájirıbemen ushtastyrýǵa múmkindik beredi. Oqý ýaqytynyń 60%-yn stýdentter tikeleı óndiriste ótkizip, suranysqa ıe mamandyqtardy is júzinde meńgeredi.
Búginde bul júıege elimizdegi 552 kolledjde 18 myńnan astam kásiporyn qatysady. Olardyń qatarynda mashına jasaý, qurylys, energetıka, IT jáne servıs salasyndaǵy iri kompanııalar bar. Mundaı yntymaqtastyq formaty stýdentterge tájirıbelik mashyq beredi, al jumys berýshiler úshin — óndiristiń naqty suranysyna saı bilikti kadrlar daıarlaýdy qamtamasyz etedi.
— Dýaldy oqytýdy damytý — tehnıkalyq jáne kásiptik bilim berý júıesindegi basym baǵyttardyń biri. Búginde memlekettik tapsyrys boıynsha bilim alǵan kolledj túlekteriniń 70%-dan astamy oqýyn támamdaǵan soń birden óz mamandyǵy boıynsha jumysqa ornalasady, — deıdi Tehnıkalyq jáne kásiptik bilim berý departamentiniń dırektory Aset Mýhanbetov.
2024 jyly memlekettik tapsyrys negizinde dýaldy oqytý formatynda oqýyn aıaqtaǵan túlekter sany 30 myńnan asty, olardyń 71%-y qazirdiń ózinde jumysqa ornalasqan.
Jumysshy mamandyqtary jyly jáne tehnıkalyq-kásiptik bilim berý júıesin transformatsııalaý aıasynda 2027 jylǵa qaraı dýaldy júıemen oqıtyn stýdentterdiń úlesi 50%-ǵa deıin ósedi. Negizgi bastamalardyń qatarynda — Germanııanyń Erfýrt ýnıversıtetimen birlesip Halyqaralyq dýaldy oqytý ortalyǵyn ashý, sondaı-aq «Atameken» UKP qoldaýymen tálimgerlik ınstıtýtyn damytý bar.
Aıta ketelik Abaı oblysynyń oqýshysy baqsha sýaratyn robot oılap tapty.