Jańa oqý jylynda 380 myńnan astam bala birinshi synypqa barady
ASTANA. KAZINFORM — Qazaqstanda balalardy birinshi synypqa qabyldaý jalǵasýda. Jańa oqý jylynda 380 myńnan astam bala mektep tabaldyryǵyn attaıdy dep kútilýde. Búginde boljanǵan bala sanynyń 320 myńǵa jýyǵy, ıaǵnı shamamen 84%-y mektepterge qabyldandy.
Qabyldanǵan balalardyń 296 myńǵa jýyǵy memlekettik, 23 myńǵa jýyǵy jekemenshik mektepterde bilim alady. Qalalyq mektepterge 191 myńǵa jýyq, aýyldyq mektepterge 128 myńǵa jýyq bala qabyldandy. Sondaı-aq bilim berý uıymdaryna erekshe bilim berý qajettilikteri bar 4 myńǵa jýyq bala qabyldandy.
Bolashaq birinshi synyp oqýshylarynyń 71%-dan astamy qazaq tilinde, 26%-dan astamy orys tilinde, taǵy 2,5%-ǵa jýyǵy basqa tilderde bilim beretin synyptardy tańdaǵan. Sonymen qatar ózge ult ókilderiniń 2 myńnan astam balasy qazaq tilinde bilim beretin synyptarǵa qabyldandy. Bul ata-analardyń balalaryn qazaq tilinde oqytýǵa degen qyzyǵýshylyǵynyń artyp kele jatqanyn kórsetedi.
Qujattardy qabyldaý Oqý-aǵartý mınıstrligi men Jasandy ıntellekt jáne tsıfrlyq damý mınıstrliginiń birlesken buıryǵy negizinde pılottyq joba aıasynda júrgizilýde. Ótinishter 2026 jylǵy 27 mamyr men 31 tamyz aralyǵynda bekitilgen kestege sáıkes kezeń-kezeńimen qabyldanady.
Ótinishterdiń 84%-ǵa jýyǵyn ata-analar elektrondyq formatta bergen. Qujattardy eGov.kz elektrondyq úkimet portaly nemese eGov Mobile mobıldi qosymshasy arqyly, sondaı-aq tańdalǵan mektepke tikeleı tapsyrýǵa bolady.
Birinshi synyp oqýshylarynyń eń kóp sany Túrkistan oblysynda - 50 myńnan astam, Almaty oblysynda - 35 myńnan astam, Astanada - 33 myń, Almatyda - 31 myńnan astam jáne Shymkentte - 29 myńnan astam bolady dep kútilýde. Bul osy óńirlerdegi halyq sanynyń kóptigimen jáne týý deńgeıiniń joǵary bolýymen baılanysty.
Aıta ketelik Densaýlyq saqtaý mınıstrligi mektep rıýkzagyn qalaı tańdaý kerektigin túsindirgen edi.
