Jańa oqý jylynda 370 myńnan astam bala 1-synypqa qabyldanady

ASTANA. KAZINFORM — Qujattardy birinshi synypqa qabyldaý 2025 jyldyń 1 sáýirinen 31 tamyzyna deıin jalǵasady. Jańa oqý jylynda 370 myńnan astam qazaqstandyq bala mektep tabaldyryǵyn attaıdy dep josparlanǵan.

QR Oqý-aǵartý mınıstrligi Orta bilim komıtetiniń aqparaty boıynsha, QR «Bilim týraly» Zańyna sáıkes, birinshi synypqa 6 jastan bastap ata-analardyń ótinishi boıynsha qabyldanady. Qujattardy eGov mobile qosymshasy men elektrondy úkimet portaly arqyly, sondaı-aq qaǵaz túrinde — tikeleı mektepterde tapsyrýǵa bolady. Ol úshin barlyq mektepte qabyldaý komıssııalary jumys isteıdi.

QR TsDIAÓM «Ulttyq aqparattyq tehnologııalar» AQ-nyń málimetinshe, bıyl eGov portalynda qujat tapsyrý rásimi jeńildetilgen.

Endi ata-analarǵa medıtsınalyq anyqtamalardy qolmen júkteýdiń qajeti joq – «Bala densaýlyǵy pasporty» men «Profılaktıkalyq ekpe kartasyndaǵy» málimetter avtomatty túrde alynady. Eger medıtsınalyq anyqtamalar júıede bolmasa, olardyń skan-kóshirmelerin júkteýge bolady. Sondaı-aq, ótinishtiń mártebesin qaraý jáne ony bir batyrmamen keri qaıtarý múmkindigi qarastyrylǵan.

Aıta keteıik, ótinishter mereke jáne demalys kúnderin qospaǵanda dúısenbiden jumaǵa deıin qabyldanady. Suranys jiberilgennen keıin ótinishti qaraý merzimi – 1 jumys kúni.

Elimizde 1-synyp oqýshylary 10 aqpannan bastap demalysqa shyǵatynyn jazǵan bolatynbyz.

Ótken jyly elimizde 1-synypqa 336 000-nan astam oqýshy qabyldandy.