Jańa oqý jylynda 1,7 mln oqýshyǵa tegin tamaq beriledi

ASTANA. KAZINFORM — 1 qyrkúıekte Qazaqstannyń mektepterine, kolledjderine jáne joǵary oqý oryndaryna 3,9 mln bala barady, onyń 360 myńy – birinshi synyp oqýshylary. Jalpy oqý jyly 7,9 myń bilim berý uıymynda bastalady – mundaı málimetti Úkimet otyrysy barysynda oqý-aǵartý mınıstri Ǵanı Beısembaev aıtty.

Búgingi tańda óńirlerde oqýlyqtarmen qamtamasyz etý 90%-ǵa jetedi. 25 tamyzǵa deıin barlyq oqýlyqtar óńirlerge jetkiziletin bolady.

Áleýmettik osal sanattaǵy otbasylardan shyqqan balalarǵa tegin tamaq berýdi uıymdastyrý jáne áleýmettik kómek kórsetý máselelerine erekshe nazar aýdaryldy.

«1 qyrkúıekten bastap 1,7 mln oqýshy tegin tamaqtanatyn bolady. Jyl saıyn áleýmettik osal sanattaǵy otbasylarǵa kómek kórsetiledi. Bıyl 510 myń bala mektepke daıyndalý úshin tıisti kómekpen qamtyldy. Osy maqsatta bıýdjetten 22,6 mlrd teńge qarastyrylǵan», — dedi Oqý-aǵartý mınıstri.