Jańa oqý jylynan bastap mektepterde úsh jańa mindetti kýrs engiziledi
ASTANA. KAZINFORM — Elordada negizgi jáne jalpy orta bilim berý pedagogteriniń respýblıkalyq jazǵy sessııasy bastaldy.
Astanada Oqý-aǵartý mınıstri Juldyz Súleımenovanyń qatysýymen Y.Altynsarın atyndaǵy Ulttyq bilim akademııasy uıymdastyrǵan «Negizgi jáne jalpy orta bilim berý: sapaly ózgerister jáne kásibı damý» atty respýblıkalyq jazǵy sessııa bastaldy.
Sessııaǵa elimizdiń barlyq 20 óńirinen 300 jýyq pedagog qatysyp jatyr. Olardyń qatarynda bilim basqarmalarynyń jaýapty mamandary, ádistemelik ortalyqtardyń ókilderi, mektep dırektorlarynyń oqý isi jónindegi orynbasarlary jáne 5-11 synyptarda sabaq beretin pán muǵalimderi bar.
Semınardyń ashylýynda Juldyz Súleımenova jańa oqý jylyndaǵy negizgi jáne jalpy orta bilim berýdiń negizgi mindetteri men basym baǵyttaryna toqtalyp, engiziletin ózgeristerdi barlyq óńirde sapaly ári birizdi iske asyrýdyń mańyzyn atap ótti.
Jazǵy sessııa jańa oqý jyly qarsańynda negizgi jáne jalpy orta bilim berý júıesindegi negizgi ózgeristerdi talqylaýǵa, olardy tájirıbege engizýdiń ortaq tásilderin qalyptastyrýǵa jáne pedagogterge ádistemelik qoldaý kórsetýge baǵyttalǵan.
Plenarlyq otyrys pen taqyryptyq vorkshoptar aıasynda Jańa Konstıtýtsııa qundylyqtaryn, «Adal azamat» birtutas tárbıe baǵdarlamasyn, «Taza Qazaqstan» tujyrymdamasyn, «Zań men Tártip» qaǵıdatyn, jetildirilgen úlgilik oqý baǵdarlamalaryn, baǵalaýdyń jańa tásilderin jáne jasandy ıntellekt quraldaryn negizgi jáne jalpy orta bilim berý júıesine engizý máseleleri talqylanýda.
Jańa oqý jylynan bastap 5-7 synyptarda «Konstıtýtsııa negizderi», 8-11 synyptarda «Zań jáne tártip», al 5-11 synyptarda «Jeke qaýipsizdik» mindetti kýrstary engiziledi. Sonymen qatar «Quqyq negizderi» pániniń mazmuny Jańa Konstıtýtsııa talaptaryna sáıkes jańartylyp, bilim alýshylardyń quqyqtyq mádenıetin qalyptastyrýǵa baǵyttalady.
Aıta ketelik bilim grantyna ótinish bergender sany 127 myńǵa jýyqtaǵany týraly jazǵan edik.
