Jańa oqý jylynan bastap 3-synyp oqýshylary «Beıneleý óneri» pánin oqıdy
ASTANA. KAZINFORM – Jańa oqý jylynan 3-synyp oqýshylary «Beıneleý óneri» pánin oqıdy. Bul týraly Senat depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«2022-2023 oqý jylynan bastap bastaýysh synypta «Kórkem eńbek» páni «Eńbekke baýlý» jáne «Beıneleý óneri» eki jeke oqý pánderi bolyp bólindi. «Beıneleý óneri» páni memlekettik bilim berý standarty jáne Úlgilik oqý josparlary negizinde júzege asyrylady. Beıneleý óneriniń taqyryptary «Kórkem eńbek» pániniń oqý baǵdarlamasynyń mazmunyna kiriktirilgen. Jalpy orta bilim berý júıesindegi «Kórkem eńbek» oqý pániniń ereksheligi ártúrli óner túrlerin zerdeleý, ıdeıalardy óner tásilderi arqyly kórsetý, ámbebap (turmystyq) jáne arnaıy (pándik) bilimder men ıkemdilikti, materıaldar men nysandardy túrlendirý jáne kórkem óńdeý daǵdylaryn, úı sharýashylyǵyn júrgizý, tehnologııalar men tehnıkany qoldaný mashyqtaryn ıelený», - dedi Úkimet basshysynyń orynbasary.
Vıtse-premerdiń dereginshe, qazirgi kezde «Beıneleý óneri» páni 1-2 synyptarda aptasyna 1 saǵattyq oqý júktemesimen jylyna 33-34 saǵat tolyq oqytylady.
«Aldaǵy 2024-2025 oqý jylynda 3-synypta jáne 2025-2026 oqý jylynda 4-synypta oqytylatyn bolady. Negizgi orta bilim berý deńgeıinde «Kórkem eńbek» páni 5-6 synyptarda aptasynda 2 saǵattyq júktemesimen jylyna 68 saǵat oqytylady. Onyń ishinde 1 saǵat «Vızýaldyq óner» bólimine bólingen», - dedi Tamara Dúısenova.
