Jańa oqý jylyna deıin oqýlyqtar jańartylyp, anyqtalǵan qateler túzetiledi - mınıstrlik

Vedomstvonyń málimetinshe, Memleket basshysynyń tapsyrmasyna sáıkes barlyq oqýlyqtarǵa qosymsha saraptama júrgizilgen. Bul jumys oqýlyqtardyń sapasyn arttyrý maqsatynda qolǵa alynǵan.

– Qazirgi ýaqytta baspalarmen jáne sarapshylarmen birlesip anyqtalǵan eskertýlerdi joıý jumystary júrgizilýde. Qosymsha ýaqyt oqýlyqtardyń sapasyn tolyq qamtamasyz etý úshin qajet. Oqý-aǵartý mınıstrliginiń basty mindeti – árbir oqýshyny memlekettik jalpyǵa mindetti bilim berý standarttaryna, Qazaqstan Respýblıkasynyń jańa Konstıtýtsııasyna jáne bilim berý júıesiniń ózekti talaptaryna sáıkes keletin sapaly ári zamanaýı oqýlyqtarmen qamtamasyz etý, – delingen mınıstrlik habarlamasynda.

Buǵan deıin Premer-Mınıstrdiń orynbasary – Mádenıet jáne aqparat mınıstri Aıda Balaeva qosymsha tekserý barysynda mektep oqýlyqtarynan 700-den astam eskertý men qatelik anyqtalǵanyn málimdegen bolatyn. Osyǵan baılanysty oqýlyqtardy bekitýge deıin olardy qosymsha jetildirý týraly sheshim qabyldanǵan.

Mınıstrlik málimetinshe, oqýlyqtardy jańartý kezeń-kezeńimen júzege asyrylady. Bıylǵy 30 tamyzǵa deıin 3-synypqa arnalǵan «Qazaq tili», «Orys tili», «Matematıka», «Dúnıetaný», «Ádebıettik oqý», «Mýzyka» pánderiniń, sondaı-aq 7-synyptyń «Dúnıejúzi tarıhy» oqýlyǵy satyp alynady.

– Oqýlyqtardy tańdaý Etandau.gov.kz elektrondyq platformasy arqyly júrgizildi. Sonyń nátıjesinde jergilikti atqarýshy organdar baspalarǵa ótinim joldady. Sonymen qatar óńirlerde oqýshylar sanynyń artýy men kitaphana qoryn jańartý qajettiligi eskerilip, qalǵan synyptarǵa arnalǵan oqýlyqtardy qosymsha satyp alý jalǵasyp jatyr. Al 2027 jylǵy 1 qańtarǵa deıin 4 jáne 9-synyptardyń, 2027 jylǵy 1 sáýirge deıin 8-synyptyń oqýlyqtaryn jańartý josparlanǵan, – dep málimdedi mınıstrlik.

Aıta keteıik, buǵan deıin mektep oqýlyqtarynan 700-den astam qate men kemshilik anyqtalǵany habarlandy.