Jańa oqý jylyna daıyndyǵy nashar mektepter qaı óńirlerde ekeni anyqtaldy

ASTANA. KAZINFORM — 1 qyrkúıekke qaraı jańadan 61 mektep ashý josparlanyp otyr. Bul týraly Úkimet otyrysynda Premer-Mınıstr Oljas Bektenov aıtty.

«Qyrkúıek aıynda elimizde 4,5 mln bilim alýshy oqýǵa barady. Bul – balalarmen qatar, olardyń ata-analary úshin de óte mańyzdy qadam. Sondyqtan bilim berý ınfraqurylymynyń jáne búkil oqý protsesiniń jańa oqý jylyna tolyq ázirligin qamtamasyz etý qajet. 1 qyrkúıekke qaraı jańadan 61 mektep ashý josparlanyp otyr. Mektepterdi tapsyrý bir bólek, olardy oqýshylardy qabyldaýǵa daıyndaý úshin de úlken jumys atqarý kerek. Ǵımarattarǵa, oqý kabınetterine, ashanalarǵa qoıylatyn barlyq qaýipsizdik sharttaryn, sanıtarııalyq-epıdemıologııalyq jáne órtke qarsy talaptardy oryndaý qajet. Jyldamdyǵy joǵary ınternetpen qamtamasyz etip, pándik kabınetterdi, zerthanalardy, sport zaldaryn jabdyqtaý kerek. Bul – tek «Jaıly mektep» ulttyq jobasyna ǵana emes, barlyq bilim berý obektilerine qatysty qoıylyp otyrǵan talap», - dedi O.Bektenov.

Sonymen qatar Úkimet basshysy birqatar óńirde keıbir oqý oryndarynyń daıyndyǵy tıisti deńgeıde emes ekenin aıtty.

«Atap aıtqanda, jańa oqý jylyna deıin úlgermeı qalý qaýpi bar bilim oshaqtarynyń jeteýi Aqtóbe oblysynda ornalasqan. Qurylys jumystary negizsiz sozylyp ketti. Osy baǵytta barlyq kúsh-jigerdi biriktirip, obektilerdiń belgilengen merzimde tapsyrylýyn qamtamasyz etý qajet. Sondaı-aq tamyz aıynda kúrdeli jóndeý jumystarynyń barlyǵy aıaqtalýy tıis. Alaıda, 18 mektepte josparlanǵan jumystardyń 30 paıyzy ǵana oryndalǵan. Bul másele Qaraǵandy, Soltústik Qazaqstan jáne Ulytaý oblystaryna qatysty. Atalǵan óńirler shuǵyl sharalar qabyldamasa bolmaıdy. Balalar taza ári yńǵaıly kabınetterde bilim alýy úshin oqý protsesi bastalǵanǵa deıin jóndeý jumystaryn aıaqtańyzdar», - dedi Premer-Mınıstr.