Jańa oqý jyly: oqýshylar JI-di qalaı meńgeredi
ASTANA. KAZINFORM – Jańa oqý jylynan bastap jasandy ıntellekt mektep baǵdarlamasyna engiziledi. Endi oqýshylar JI-diń múmkindikteri men jumys isteý prıntsıpterin meńgeredi.
Balalarǵa naqty ne úıretiledi? JI-di qoldaný men odan daıyn jaýap alýdyń arasy qalaı ajyratylady? Muǵalimderdiń ózderi jańa baǵdarlamaǵa daıyn ba?
Osy jáne ózge de suraqtarǵa Astana qalasyndaǵy №107 jalpy bilim beretin mekteptiń dırektory Aıgúl Beısenbına Jibek Joly telearnasynyń «Búgin.LIVE» baǵdarlamasynda jaýap berdi.
Byltyr mektepterde jasandy ıntellektini oqý úderisinde qoldaný pılottyq rejımde bastaldy. Bir jyldyq tájirıbeden keıin JI jańa oqý jylynan bastap mektep baǵdarlamasyna tolyq engizilmek. Endi oqýshylar «Informatıka jáne jasandy ıntellekt» páni aıasynda onyń qyr-syryn meńgere alady.
– 2025–2026 oqý jylynda tsıfrlyq transformatsııalaý pılottyq jobasy aıasynda JI múmkindikterin oqý úderisinde júıeli qoldandyq. Osy kezeńde pedagogter JI quraldaryn meńgerip, oqýshylarǵa ony qoldanýdyń etıkalyq normalary men saýatty prompt qurastyrý joldaryn úıretti. Bıyl muǵalimder de, oqýshylar da jasandy ıntellektini qoldanýǵa daıyn, – dedi Aıgúl Beısenbına.
Bul rette oqýshynyń JI-den daıyn jaýap alýyna emes, tehnologııany paıdalana otyryp, ózdiginen izdenip, oı qorytýyna basymdyq beriledi.
– Bizdiń maqsat — JI-di daıyn jaýap alýdyń quralyna aınaldyrmaý. Kerisinshe, ony oqýshynyń zertteýshilik daǵdysyn damytatyn assıstent retinde paıdalaný. Pedagogter daıyn jaýapty emes, oqýshynyń máseleni sheshý jolyn, logıkalyq paıymdaýyn, aqparatty taldaýyn jáne ózindik qorytyndysyn baǵalaıdy, - dedi ol.
Spıker sózinshe, ótken jyly oqýshylardyń ózdiginen izdenýine baǵyttalǵan «Bir bala — bir joba» bastamasy da júzege asyrylǵan eken.
– Pılottyq kezeńde «Bir bala – bir joba» bastamasy da júzege asyryldy. Bul joba aıasynda ár oqýshyǵa jeke taqyryp berilip, ol jumysty óz betinshe júzege asyrady. Maqsat — aqparatty kóshirip alý emes. Oqýshy JI múmkindikterin paıdalana otyryp, ár qadamyn zertteıdi, aqparatty taldaıdy, usynylǵan jaýaptardyń durystyǵyn tekseredi jáne nátıjesinde óz jobasyn jasaıdy, - dedi mektep dırektory.
Kópshilikti qyzyqtyratyn taǵy bir másele – oqýshy úı tapsyrmasyn JI kómegimen oryndasa, muǵalim ony qalaı anyqtaıdy? Bul saýalǵa spıker de jaýap berdi.
– Jasandy ıntellekt arqyly oryndalǵan daıyn jumysty muǵalim birden baıqaıdy. Sebebi pedagogter oqýshynyń daıyn jaýabyn, referatyn nemese mátinin ǵana baǵalamaıdy. Negizgi nazar — onyń máseleni qalaı sheshkenine, logıkalyq paıymdaýyna, aqparatty taldaýyna jáne ózindik qorytyndy jasaı bilýine aýdarylady, – dedi ol.
Aıgúl Beısenbınanyń aıtýynsha, JI-men jumys isteýde aqparattyń durystyǵyn tekserýmen qatar, qaýipsizdik talaptaryn saqtaý da mańyzdy.
– JI-men jumys isteýde qaýipsizdik pen etıka máselesine de erekshe mán beremiz. Mekteptiń ishki erejelerinde derbes derekterdi qorǵaý talaptary qarastyrylǵan. Oqýshylarǵa aty-jónin, qupııa sózderin, telefon nómirin jáne basqa da jeke málimetterin ashyq JI júıelerine engizýge bolmaıtyny túsindiriledi, - Astana qalasy №107 jalpy bilim beretin mekteptiń dırektory.
Bıyl bastaýysh synyptarda JI-diń negizgi múmkindikteri, al orta jáne joǵary býynda prompt-ınjınırıng, baǵdarlamalaý sııaqty kúrdelirek baǵyttar oqytylady.
– Jasandy ıntellektini bilim berý júıesine engizýdegi negizgi maqsat — tehnologııaǵa táýeldi urpaq qalyptastyrý emes, tehnologııany sanaly paıdalanyp, ózdiginen oılaıtyn, zertteıtin jáne jańa ónim jasaı alatyn oqýshy tárbıeleý, - dedi spıker.
Mamandardyń aıtýynsha, jasandy ıntellekt oqýshynyń múmkindigin shektemeı, kerisinshe, ony keńeıtýge múmkindik beredi.
– Pılottyq joba kórsetkendeı, JI-den qorqýdyń qajeti joq. Ony durys qoldaný oqýshynyń múmkindigin keńeıtedi. Mysaly, kópshilik aldynda suraq qoıýǵa nemese oıyn aıtýǵa qymsynatyn oqýshylar JI arqyly aldymen qajetti aqparatty óz betinshe zerttep, belgili bir taqyrypty túsindirý joldaryn suraı alady. Biraq sońǵy jumysty oqýshynyń ózi oryndaıdy, - dedi Aıgúl Beısenbına.
Aıta keteıik, mektep pánderiniń mazmuny da jasandy ıntellekt baǵytynda jańartylyp jatyr.
