Jańa oqý jyly men qazylǵan kósheler: Almaty kólik júktemesine daıyn ba

Jańa oqý jyly bastalǵan soń, tańǵy jáne keshki ýaqytta jolǵa shyǵatyn adamdardyń qatary kúrt artady. Bul, ásirese, Almatyda bilinedi. Ata-analar tańerteń balalaryn balabaqsha men mektepke aparsa, stýdentter kolledj ben ýnıversıtetke barady. Keshki ýaqytta bári úıge qaıtady.

Jazǵy ýaqyt aıaqtalǵan soń, demalystan keıin jumysqa shyǵatyn adamdardyń qatary kóbeıedi. Sonyń áserinen onsyzda kóligi kóp qala kóshelerinde keptelis kúsheıip ketedi. Qyrkúıektiń alǵashqy aptalarynda júrgizýshiler kepteliste 2-3 saǵatqa deıin turýy múmkin.

Alaıda almatylyqtar bıyl bul jaǵdaı tipti ýshyǵyp ketýi múmkin dep alańdap otyr. Sebebi megapolıstiń biraz kóshelerinde jol jóndeý, ınjenerlik jelilerdi aýystyrý jumystary aıaqtalǵan joq. Odan bólek LRT qurylysy sekildi osy jyly bitpeıtin iri jobalardyń da kóshedegi ahýalǵa áseri bar.

Áleýmettik jelide bul jaǵdaıǵa qatysty pikirler kóp. Máselen, Asyljan esimdi turǵyn Ótegen batyr, Jubanov, Altynsarın kóshelerin jazdyń basynda emes, oqý jylynyń aldynda qazylyp jatqanyna tańdanys bildirgen.

Taǵy bir jeli qoldanýshysy Almatyda joldar men trotýarlardyń mundaı aýqymdy jóndeýin alǵash ret kórgenin aıtyp, Tımırıazev kóshesindegi jaǵdaı boıynsha beınejazba jarııalaǵan.

Dına esimdi qala turǵyny Sátbaev kóshesindegi jóndeý jumystary men qorshaýlardyń kesirinen aıaldamaǵa jetý qıyndaǵanyn habarlady.

- Abaı dańǵylynda jol jumystary júrip jatyr. Qyrkúıekte ne bolatynyn elestetýge qorqamyn, - dep jazdy Erke esimdi jeli qoldanýshysy.

Almaty ákimdigi kóshe men joldardaǵy aýqymdy jumystardyń basym bóligin qashan aıaqtalatyny týraly aqparat usynǵan joq. Degenmen, qyrkúıek aıynyń basynda keptelis pen kólik júktemesin azaıtýǵa baǵyttalǵan sharalar týraly túsindirdi.

Qala ákimdiginiń málimetinshe, balalardyń qaýipsizdigin qamtamasyz etý, kólik júktemesin azaıtý jáne qala turǵyndarynyń jaıly júrip-turýyna jaǵdaı jasaý maqsatynda birqatar shara qabyldandy. Atap aıtqanda, oqýshylardy tasymaldaý úshin 60 mektepke 300 mektep avtobýsy jumyldyrylady. Olar 13 myńnan astam balany qamtıdy.

Al bilim berý uıymdarynyń mańynda jol qozǵalysyn retteý kúsheıtiledi. 1 qyrkúıek tańerteń mektepterdiń mańynda, júrginshiler ótkelderinde jáne kólik qozǵalysy eń kóp ýchaskelerde 470 polıtsııa qyzmetkeri kezekshilik atqarady.

Odan bólek jańa oqý jylynyń alǵashqy eki aptasynda qoǵamdyq kóliktiń jumysy kúsheıtiledi. Qoldanystaǵy 3 200 avtobýsqa qosymsha rezervten 500-ge jýyq avtobýs shyǵarylady. Al metropolıtende poıyzdar sany 11-den 13 quramǵa deıin kóbeıtilip, tańǵy ýaqytta qozǵalys aralyǵy 3 mınýtqa deıin qysqarmaq.

- Jańa oqý jyly qarsańynda ákimshilik polıtsııamen birlesip, bilim berý uıymdarynyń mańyndaǵy jol ınfraqurylymynyń jaǵdaıy tekserildi. Sonyń nátıjesinde 140-tan astam eskertý boıynsha kemshilikter joıyldy. Barlyq bilim berý uıymynyń mańynda qajetti jumystar júrgizildi, - dep habarlady ákimdikten.

Sonymen qatar Almaty ákimdigi qyrkúıektiń alǵashqy aptasynda júk kólikteriniń qozǵalysyna baqylaý kúsheıtiletinin atap ótti. Qoldanystaǵy shekteýge sáıkes, salmaǵy 8 tonnadan asatyn júk kólikteriniń belgilengen ýchaskelerde saǵat 07:00-den 22:00-ge deıin júrýine tyıym salynady.

Kólik júktemesin azaıtýǵa baǵyttalǵan sharalardyń biri - iri kompanııalar jumysynyń ishinara onlaın formatqa ótý.

- Qala ortalyǵynda ornalasqan iri kompanııalarǵa, bankterge jáne basqa da uıymdarǵa qyrkúıektiń alǵashqy kúnderi qyzmetkerlerdiń bir bóligin ýaqytsha qashyqtan jumys isteý formatyna aýystyrý múmkindigin qarastyrý nemese jumys kúniniń bastalý ýaqytyn ıkemdi etý usynyldy. Óz kezeginde ákimdiktiń qurylymdyq bólimsheleri men olarǵa qarasty uıymdar 2026 jyly 1-5 qyrkúıek aralyǵynda qyzmetkerlerdiń bir bóligin qashyqtan jumys isteý formatyna aýystyrý sharalaryn qabyldaıdy, - dep habarlady ákimdikten.

Eske salaıyq, buǵan deıin Almaty ákimdigi men polıtsııa turǵyndarǵa úndeý jasap, 1 qyrkúıekte jeke kólikti úıde qaldyrýǵa shaqyrdy.