Jańa oqý jyly: mektepter men kolledjderde jasandy ıntellekt tehnologııasy engiziledi

ASTANA. KAZINFORM – Kolledjderge memlekettik bilim berý tapsyrysy aıasynda 150 myń stýdentti qabyldanady. Bul týraly Oqý-aǵartý mınıstri Ǵanı Beısembaev málim etti.

- Bıyl kolledjderge memlekettik bilim berý tapsyrysy aıasynda 150 myń stýdentti qabyldaý josparlanǵan. Bul jumysshy mamandyqty tańdaǵan mektep túlekterin suranysqa ıe mamandyqtar boıynsha 100% tegin oqytýmen qamtýǵa múmkindik beredi. Memlekettik tapsyrystyń 70%-y tehnıkalyq salada kadrlar daıarlaýǵa baǵyttalady, - dedi Ǵ. Beısembaev Úkimet otyrysynda.

Onyń aıtýynsha, 2022 jyldan bastap kásiporyndardyń ótinimderi boıynsha jumysqa ornalastyrý mindettemesimen maqsatty memlekettik tapsyrys arqyly oqıtyn stýdentter sany úsh esege artyp, 30 myń adamdy qurady. Jańa oqý jylynda bul kórsetkishti 45 myńǵa deıin arttyrý josparlanǵan.

Sondaı-aq jańa oqý jylynda mekteptermen qatar, tehnıkalyq jáne kásiptik bilim berý deńgeıinde de oqý protsesinde jasandy ıntellekt tehnologııasyn engizý bastalady.

Budan buryn habarlanǵandaı, bıyl balabaqshalar vaýcherlik qarjylandyrý júıesine ótedi.