Jańa oqý jyly qarsańynda jarty mıllıon oqýshyǵa kómek kórsetiledi

2025–2026 oqý jylynyń qarsańynda elimizde «Jalpyǵa birdeı bilim berý» qory aıasynda oqýshylardy mektepke daıyndaý jumystary júrgizilip jatyr. Bıyl 500 myńnan astam balaǵa qoldaý kórsetilmek. Bul týraly Oqý-aǵartý mınıstrliginiń baspasóz qyzmeti habarlady. 

Qor dástúrli túrde jetim, ata-ana qamqorlyǵynsyz qalǵan balalarǵa, az qamtylǵan jáne ataýly áleýmettik kómek alatyn otbasy balalaryna kómek beredi. Sonymen qatar, ómirlik qıyn jaǵdaıǵa tap bolǵan balalar da nazardan tys qalmaıdy.

Kómek ata-analardyń esepshottaryna aýdarylady, bul olarǵa mektep formasyn, aıaq kıim jáne keńse taýarlaryn ózdiginen tańdaýǵa múmkindik beredi. 2025 jyly bir balaǵa beriletin eń tómengi soma kólemi — 46 228 teńge.

— Oqý-aǵartý mınıstrligi áleýmettik osal sanattaǵy balalarǵa kómek kórsetý boıynsha ashyq ári yńǵaıly tetik qalyptastyrdy. Bul qoldaý sharasy búginde barlyq óńirde iske asyrylyp jatyr, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraıymy Nasymjan Ospanova.

«Jalpyǵa birdeı bilim berý» qory jyl saıyn myńdaǵan balanyń oqý jylyna daıyndalýyna jaǵdaı jasap keledi. Bıyl bul maqsatqa ótken jylǵydaı kólemde qarjy qarastyrylǵan.

Aıta ketelik Batys Qazaqstanda birinshi synypqa 12 myńǵa jýyq oqýshy qabyldanatyny týraly jazǵan edik.