Jańa oqý jyly: bólingen grant sany naqtylandy
ASTANA. KAZINFORM – 2024-2025 oqý jylyna arnalǵan memlekettik tapsyrysta 112 myń grant qamtyldy. Bul týraly QR Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti málim etti.
«Elimizde joǵary bilimdi halyq sanyn arttyrý maqsatynda joǵary bilim berýdiń barlyq deńgeıi boıynsha 2024-2025 oqý jylyna arnalǵan memlekettik tapsyrysta 112 myń grant (bakalavrıat-79 myńǵa jýyq grant, magıstratýraǵa -13 myńǵa tarta, doktorantýra -1 900 astam grant) bólingen.
Granttardyń basym bóligi «Injenerlik, óńdeý, qurylys salalary» bilim berý baǵdarlama toptaryna bólindi. Olardyń sany 19 344 grantty qurady. Al «Pedagogıkalyq ǵylymdarǵa» – 13 735 grant, «Aqparattyq-kommýnıkatsııalyq tehnologııalar» salasyna – 10 903 grant, «Jaratylystaný ǵylymdary, matematıka jáne statıstıka» baǵytyna 8 288 grant tıesili», - delingen vedomstvonyń Kazinform agenttigine bergen jaýabynda.
Bıyl alǵash ret ishinara oqý aqysy bar saralanǵan granttar engizildi. «Pedagogıkalyq ǵylymdar» jáne «Áleýmettik ǵylymdar, jýrnalıstıka jáne aqparat» bilim berý baǵdarlamalar toby boıynsha 150 saralanǵan granttan bólingen.
Budan bólek, «Serpin» baǵdarlamasy arqyly oqýǵa túsetinderge 3 903 grant bólingen. «Serpin» jobasy arqyly 4 daıarlaý baǵyty boıynsha bilim alýǵa bolady. Atap aıtqanda, pedagogıkalyq ǵylymdar, ınjenerlik-tehnıkalyq, aqparattyq tehnologııalar, aýyl sharýashylyǵy mamandyqtary boıynsha oqýǵa túse alady. Baǵdarlamaǵa ońtústik óńirdegi aýyl jastary qatysady. Granttar tiziminde halyq tyǵyz qonystanǵan jáne batys óńirlerdiń jastaryn jetekshi joǵary oqý oryndarynda oqytý úshin maqsatty bilim berý granty bar. Onyń ishinde granttar Atyraý jáne Mańǵystaý oblysy túlekterine arnalǵan.
Budan buryn habarlanǵandaı, bıyl UBT aıasynda grant konkýrsyna ótinish 13-20 shilde aralyǵynda qabyldanady.
Tasqynnan zardap shekken óńir túlekterine 12 myń bilim granty arnaıy bólindi.
